Си Цзиньпин Түрікменстаннан Қытайға газ жеткізу көлемін ұлғайтуға шақырды

ҚХР төрағасы қытай-түрікмен әріптестігін кеңейту қажеттігін мәлімдеді. Оның ішінде табиғи газ жеткізілімін арттыру, сауда мен инвестиция көлемін ұлғайту мәселелері бар. Сондай-ақ инфрақұрылым, ауыл шаруашылығы, цифрлық экономика, жасанды интеллект және таза энергетика сияқты шикізаттық емес бағыттарға басымдық беру ұсынылды. Бұл туралы Си Цзиньпин Гурбангулы Бердымұхамедовпен Бейжіңде өткен кездесу барысында айтты.

Қытай тарапы «Бір белдеу – бір жол» бастамасын Түрікменстанның даму стратегиясымен ұштастыруды қолдайтынын жеткізді. Сонымен қатар білім беру және денсаулық сақтау салаларын қамтитын бірлескен жобаларды іске асыру, гуманитарлық байланыстарды тереңдету мәселелері де күн тәртібінде тұр.

Бейжің Түрікменстанның егемендігі мен бейтарап мәртебесін қолдайтынын растады. Сондай-ақ халықаралық алаңдарда, соның ішінде Біріккен Ұлттар Ұйымы аясында өзара үйлестіруді күшейтуге дайын екенін мәлімдеді. Тараптар қауіпсіздік бағытындағы ынтымақтастықты нығайтып, терроризм, экстремизм және сепаратизмге қарсы бірлесіп әрекет етуге ниетті.

Өз кезегінде Гурбангулы Бердымұхамедов Қытаймен стратегиялық әріптестікті нығайтуға бейілді екенін растады. Ол энергетика, сауда және инфрақұрылым салаларындағы ынтымақтастықты кеңейтуге мүдделі екенін атап өтті.

Бұған дейін АҚШ президенті Дональд Трамп Қытай тарапының оның Бейжіңге сапарын бір айға шегеруін сұрағанын хабарлаған болатын. Сондай-ақ сәуір айының басына жоспарланған жоғары деңгейдегі кездесу де кейінге қалдырылуы мүмкін.