Шетелдік онлайн сатып алуларға жаңа баж және ҚҚС салығы енгізіледі

Қазақстанда шетелдік маркетплейстер арқылы сатып алынатын тауарларға қатысты кедендік рәсімдер өзгермек.
Енді халықаралық пошта немесе тасымалдаушылар арқылы жеткізілетін интернет-сатып алулар «жеке пайдалануға арналған тауарлар» емес, «электрондық сауда тауарлары» ретінде жеке санатқа бөлінеді.

Осыған байланысты мұндай өнімдер міндетті түрде «электрондық сауда тауарларына арналған декларация» арқылы рәсімделеді. Алайда декларацияны сатып алушылар өздері толтырмайды — барлық рәсімді олардың атынан электрондық сауда операторлары жүргізеді. Тауарды алу тәртібі бұрынғыдай сақталады: азаматтар сәлемдемені беру пунктінен алады немесе курьерлік жеткізуді пайдалана береді.

Негізгі өзгерістер бажсыз әкелу шегінен асатын тауарларға қатысты. Қазір 200 еуродан жоғары бөлігінен 15% кедендік төлем алынса, жаңа тәртіп бойынша тауар құны 200 еуродан асқан жағдайда оның толық бағасының 5%-ы мөлшерінде баж салынады. Сонымен қатар 1 килограмына кемінде 1 еуро талап сақталады. Бұдан бөлек, 16% көлемінде қосылған құн салығы (ҚҚС) енгізіледі. Төлем сомасы тауар құны немесе салмағы бойынша есептелген көрсеткіштердің ең жоғарысына тең болады.

Құндық шек бұрынғыдай 200 еуро деңгейінде қалады, ал салмақтық шектеу алынып тасталады. Егер сәлемдеме құны 200 еуродан аспаса, жеке тұлғалар кедендік төлем төлемейді.

Электрондық сауда операторлары тауарды жеткізуге, сақтауға, кедендік декларациялауға және тапсыруға жауапты болады. Кеден заңнамасына олардың құқықтары мен міндеттері айқындалатын жеке тарау енгізіледі.

Аталған өзгерістер Мемлекет басшысы қол қойған Еуразиялық экономикалық одақ Кеден кодексіне енгізілген түзетулер аясында жүзеге асырылады. Жаңа талаптар тиісті хаттама барлық мүше мемлекеттерде ратификацияланғаннан кейін күшіне енбек.