Еуропада қымбат сатып алуларға шектеулер енгізіледі

Еуропалық одақ елдерінде қолма-қол есеп айырысуға ортақ шектеу енгізу жоспарланып отыр. 2027 жылғы 10 шілдеден бастап құны 10 000 еуродан асатын тауарлар мен қызметтер үшін қолма-қол ақшамен төлеуге тыйым салынады, деп хабарлайды Tengri Travel тілшісі The Portugal News-ке сілтеме жасап.

Еуропалық одақ елдерінде қолма-қол есеп айырысуға ортақ шектеу енгізу жоспарланып отыр. 2027 жылғы 10 шілдеден бастап құны 10 000 еуродан асатын тауарлар мен қызметтер үшін қолма-қол ақшамен төлеуге тыйым салынады, деп хабарлайды Tengri Travel тілшісі The Portugal News-ке сілтеме жасап.

Жаңа ереже ақшаны жылыстатуға және қаржылық қылмысқа қарсы күрес шаралары жиынтығына кіреді. Брюссельде қолма-қол ақшамен жасалатын ірі операцияларды қадағалау қиынырақ, демек, олар заңсыз әрекеттерді жасыру үшін пайдаланылуы мүмкін деп есептейді.

Нақты не өзгереді және бұл кімдерге қатысты болады?

Шектеу бизнес пен кәсіби секторға әсер етеді. Егер сіз компаниядан немесе кәсіби қызметпен айналысатын тұлғадан тауар немесе қызмет сатып алсаңыз, бұдан былай ірі көлемде қолма-қол ақша төлей алмайсыз. 10 000 еуродан асатын барлық төлемді құжатталған қаржылық із қалуы үшін банк арқылы аударуға немесе картамен төлеуге тура келеді.

Бұдан бөлек, 3 000-нан 10 000 еуроға дейінгі аралықтағы біржолғы қолма-қол есеп айырысулар үшін күшейтілген бақылау енгізу жоспарланып отыр, ол кей жағдайларда сатып алушының жеке басын міндетті түрде тексеруді де қамтиды.

Осылайша, ЕО негізгі шектеуге жетпеген сомалардың өзінде ірі қаражат қозғалысын анағұрлым ашық етпекші.

Ерекше жағдайлар бар ма?

Бір-бірінен бірдеңе сатып алғысы немесе сатқысы келетін қарапайым азаматтарға алаңдаудың қажеті жоқ. Шектеу коммерциялық емес жеке тұлғалар арасындағы жеке мәмілелерге қолданылмайды. Сондықтан көршіңізден қолданылған велосипедті немесе диванды қолма-қол ақшаға сатып алу заңды болып қала береді.

Басқаша айтқанда, ЕО қолма-қол ақшаны мүлдем пайдалануға тыйым салмайды. Негізгі назар коммерциялық саладағы ірі сатып алуларға аударылады, мұнда еуропалық биліктің пікірінше, төлемдердің ашықтығы өте маңызды.

Неге ЕО лимит енгізіп жатыр?

Еуропалық институттар қолма-қол ақшамен ірі есеп айырысулар ақшаның шығу төркінін жасырудың ең қолайлы тәсілдерінің бірі болып отыр деп санайды.

ЕО билігі бірыңғай лимит мынадай нәтиже береді деп үміттенеді:

ақшаны жылыстату схемаларын қиындатады; салықтан жалтарумен күресуге көмектеседі; ұйымдасқан қылмыс пен терроризмді қаржыландыру мүмкіндіктерін азайтады; елдер арасындағы күмәнді операцияларға жол ашатын айырмашылықтарды жояды.

Шын мәнінде, Брюссель шектеулері мемлекеттен мемлекетке қарай айтарлықтай ерекшеленетін қазіргі жүйенің орнына одаққа мүше барлық ел үшін ортақ ереже жасағысы келеді. Бұл ретте ең жоғарғы шек белгіленеді, бірақ төменгі шек емес. Бұл мүше мемлекеттердің өз ішінде бұдан да қатаң лимиттерді қалдыруға немесе енгізуге толық құқығы бар дегенді білдіреді.

Мәселен, Португалия үшін жаңа ереже аса көп өзгеріс әкелмейді, өйткені жергілікті заңнама қазірдің өзінде көптеген қолма-қол транзакцияны жалпыеуропалық деңгейден төмен сомалармен шектеп тастаған. Ал кейбір елдер қазірдің өзінде қатаң шектеулерді қолданады.

Ереже қашан күшіне енеді?

Регламент ЕО-ның ақшаны жылыстатуға қарсы жаңа заңы Anti-Money Laundering Regulation (EU) 2024/1624 аясында қабылданып қойған.

Құжат 2024 жылдың жазында ресми түрде жарияланды, алайда ол тек 2027 жылғы 10 шілдеден бастап қолданыла бастайды.

Осы уақытқа дейін ЕО елдері мен бизнес жаңа талаптарға бейімделуі тиіс.

Еуропа елдерінде қандай лимиттер қолданылады?

Қазіргі уақытта ЕО ішіндегі ережелер айтарлықтай ерекшеленеді.

Мысалы:

Болгарияда қолма-қол төлемдер шамамен 5 100 еуро сомасымен шектелген; Хорватияда бизнеске 10 000 еуро және одан көп соманы қолма-қол ақшамен қабылдауға тыйым салынған; Чехияда лимит күніне шамамен 10 500 еуро; Австрияда жалпы шектеу жоқ; Кипрде де лимит қарастырылмаған. Бұл сатып алушылар үшін нені білдіреді?

Күнделікті сатып алудың көпшілігі үшін өзгеріс аса байқалмайды. Мәселе, ең алдымен, қымбат тауарлар мен ірі коммерциялық мәмілелер туралы болып отыр.

Бұл ретте қолма-қол ақша ЕО-да төлем әдісі ретінде қала береді. Алайда ірі сомаларды енді банк жүйесі арқылы ғана пайдалануға болады.

Тағы оқыңыз: Шенген аймағына кірудің жаңа ережелері енгізілді: қазақстандықтар нені білуі керек?

Google News арқылы жаңалықтарымызды қадағалаңыз

Жазылу