Шойын жолда шыңдалған шебер

Сатыбалды Аманжолұлы­ның тағдыры теміржолмен ты­ғыз байланысты. Әкесі Аманжол Тастанов ақсақал кезін­де темір­жол бригадирі болып 40 жыл тапжылмай еңбек етіп, маңдай терінің өтеуі ретінде «Құрметті теміржолшы» атан­ды. Ал анасы Қарлығаш Рахымқызы – он баланы дүниеге әкелген «Алтын алқа» иегері. Сонымен бірге жол жөндеуші болып еңбек етіп, зейнетке шыққан батыр ана.

Осындай еңбекқор ортада өскен Сатыбалды 1987 жылы Ақадыр теміржол дистанция­сында еңбек жолын бастады. Отан алдындағы борышын шекара шебінде абыроймен өтеп келгеннен кейін де, ол басқа салаға бет бұрған жоқ. Әке жолын қуып, өмірін осы саламен байланыстырды.

Сатыбалды Аманжолұлы­ның еңбек жолындағы ең елеулі кезеңнің бірі – 2014 жыл еді. Сол жылы ол Жаңаарқа дистанциясына жол шебері болып ауысып, еліміздің эко­но­микалық әлеуетін арт­тыр­ған стратегиялық нысан – «Жезқазған – Сексеуіл» темір­жол құрылысына белсене араласты.

Иен далада жаңадан жол салу – тек қажыр-қайрат пен жоғары кәсібилікті қажет ететін іс. Кейіпкеріміз осы құрылыс барысында білікті ұйымдастырушы екенін, істің көзін білетін маман екенін дәлелдеді. Бүгінде сол жолмен мыңдаған тонна жүк, миллиондаған жолаушы ары-бері ағылып жатыр. Онда білікті жол шеберінің қол­таң­басы мен маңдай тері бар.

Сатыбалды ағамыздың өне­ге­лі отбасында тәрбиелен­ген пер­зенттері де бүгінде әр салада ел игілігі жолында  еңбек етіп жүр. Ерекше тоқта­­лып өтерлігі – әулеттің темір­жол­шылық дәстүрі үшінші ұр­паққа жал­ғасты.

Кенже ұлы Әнуар бүгінде әкесі еңбек жолын бастаған қасиетті мекен – Ақадыр ШЧ-21 байланыс дистанциясында аға механик ретінде жауапты қызмет атқарады. Бұл – қара шаңырақтың шойын жолға деген адалдығының айқын көрінісі. Ал үлкен ұлы Аңсар жеке кәсіпкерлік саласында өз ісін дөңгелетіп, ел экономикасына үлес қосып келеді.

Бүгінде Сатыбалды Аманжолұлы жары Айнұрмен бір­ге ұл­дарын үйлендіріп, неме­релерінің қызығына кене­ліп отырған үлгілі отба­сы­ның тірегі. Отбасында еңбек­қорлық пен адалдық қасиет­терін берік ұстанған ерлі-зайыптылар – айналасына сыйлы шаңырақ.

Қазіргі таңда Сатыбалды Аманжолұлы ПЧ-28, ПД-28 бөлімшесінде жол жөндеуші болып еңбек етеді. Жалпы, еңбек өтілі 40 жылға жуықтады. Жолдағы қажырлы еңбек – екі­нің бірінің қолынан келе бер­мейтін ерлік.

– Теміржол саласы – менің тағдырым. Әке-шешемнің осы салаға сіңірген еңбегін кө­ріп, теміржолдың қыр-сырын бала жастан санама сіңі­ріп өстім. Сондықтан бұл іске ерте кірісіп, еңбекке ерте араластым. Бұл ата-анамның аманатын арқалау, солар салған сара жолды жал­ғас­тыру – ең абыройлы мін­детім болды. Құдайға шүкір, осы жолда төккен теріміз еш кеткен жоқ. Бүгінде ұлым Әнуар да Ақадырда байланыс сала­сының тізгінін ұстап, темір­­жолшы деген абыройлы есім­ді алып жүр. Ұлымның осы мамандықты таңдап, ізі­мізді басқаны – әулетіміздегі кәсіби сабақтастықтың үзіл­мей, ұрпақтан-ұрпаққа мақ­та­нышпен жалғасып келе жат­­қанының айқын дәлелі, – дейді кейіп­керіміз өткеніне риза­шылықпен.

Сатыбалды Аманжолұлы­ның жоғары білімі мен мол тәжірибесі бүгінде жас маман­дарға мектеп іспетті. Ол – тек өз ісінің шебері ғана емес, ұжым арасында сыйлы, сөзіне ісі сай азамат.

Білікті жол жөндеушінің теміржол саласындағы 40 жыл­дық табанды еңбегі, страте­гиялық маңызы бар жол құры­лыстарына қосқан үлкен үлесі және жас мамандарды даяр­лау­дағы қажырлылығы – оның өз ісіне деген адалдығының айқын көрінісі. Әкесі Аманжол ақсақалдан қалған «Құрметті теміржолшы» жолын жалғап, үш буын бойы осы салаға қыз­мет етіп келе жатқан әулет­тің еңбегі бүгінгі қоғамда ескерусіз қалмауға тиіс.

Шойын жолдың бойында шың­далған Сатыбалды секіл­ді майталман мамандар – сала­ның нағыз алтын қоры. Сон­дық­тан мұндай еңбек адам­дарының қадірі мен абыройы әрқашан жоға­ры бағалануы керек.

Қарағанды облысы