Шығыс Қазақстан облысында мектептер үшін 100 ге жуық жаңа автобус сатып алынады

АСТАНА, 3 сәуір – Sputnik. Шығыс Қазақстан облысында 100-ге жуық жаңа мектеп автобусы сатып алынады.

Бұл туралы Өңірлік коммуникациялар қызметінде өткен брифингте облыстық білім басқармасының басшысы Қуат Оқасов мәлімдеді.

Оның айтуынша, 100-ге жуық жаңа мектеп автобусын сатып алу лизингтік бағдарлама аясында жоспарланып отыр.

"Өңірдегі мектеп автобустарының басым бөлігі ескірген. Көліктердің көпшілігі 2007 жылдары алынған, сондықтан бұл мәселе көптен бері шешуді талап етіп келген", - деді басқарма басшысы.

Қазіргі таңда облыстың 103 мектебінде 127 мектеп автобусы жұмыс істейді. Олар шамамен 4,5 мың оқушыны тасымалдап отыр. Жаңа автобустарды сатып алу автопаркті едәуір жаңартуға және оқушыларды тасымалдау қауіпсіздігін арттыруға мүмкіндік береді, дейді облыстық әкімдікте.