Алматы көшелерін ұзартуға 150 ге жуық жер телімі алынады

Алматы қаласы әкімдігінің 2025 жылғы 22 қазандағы № 4/675-1295 қаулысына сәйкес, Райымбек даңғылын ұзарту үшін Жетісу көшесінен Шығыс айналма автомобиль жолына дейін Жетісу және Медеу аудандарында орналасқан 103 жер учаскесі мемлекет мұқтажына алынады.

Мәжбүрлеп иеліктен шығару мерзімі 2028 жылдың 31 желтоқсанына дейін белгіленген.

Одан бөлек Алматы қаласы әкімдігінің 2025 жылғы 22 қазандағы № 4/675-1297 қаулысымен Хмельницкий көшесін «Қайрат» шағын ауданынан Талғар тас жолына дейін ұзарту үшін Медеу және Түрксіб аудандарында орналасқан 7 жер учаскесі мәжбүрлі түрде алынады. Жер телімдері 2027 жылдың 31 желтоқсанына дейін мемлекет меншігіне алынуы тиіс.

Сондай-ақ Алматы қаласы әкімдігінің 2025 жылғы 22 қазандағы № 4/675-1296 қаулысымен Талғар күре жолын Халиуллин көшесінен қала шекарасына дейін қайта құру үшін Медеу ауданында орналасқан 33 жер учаскесі мемлекет мұқтажына алынады. Мерзімі 2027 жылдың 31 желтоқсанына дейін белгіленген.

Бұл жер телімдерінің барлығы сатып алынған соң, Алматы қаласы жол инфрақұрылымын дамыту басқармасының теңгеріміне беріледі.

Еске салайық, бұған дейін Хмельницкий көшесін ұзарту үшін 27 учаске, Мұқанов көшесі үшін 7 учаске мәжбүрлі түрде алынатынын жазғанбыз.