Шығыс Қазақстан облысындағы жаңа әуежайлар 2026 жылы ашылмақ

Шығыс Қазақстан облысындағы жаңа әуежайлар құрылысына қатысты жаңа деректер белгілі болды. Өңір әкімі Нұрымбет Сақтағанов брифингте журналистердің сұрақтарына жауап беріп, жобалардың мерзімі, инфрақұрылым дайындығы және атқарылып жатқан жұмыстар туралы айтты, - деп хабарлайды Tengritravel.kz тілшісі.

Шығыс Қазақстан облысындағы жаңа әуежайлар құрылысына қатысты жаңа деректер белгілі болды. Өңір әкімі Нұрымбет Сақтағанов брифингте журналистердің сұрақтарына жауап беріп, жобалардың мерзімі, инфрақұрылым дайындығы және атқарылып жатқан жұмыстар туралы айтты, - деп хабарлайды Tengritravel.kz тілшісі.

Әкімнің айтуынша, Зайсан әуежайының құрылысы қазіргі уақытта шамамен 66 пайызға, ал Катонқарағайдағы нысан 55 пайызға орындалған.

"Ұшу-қону жолағы мен жолдары салынған, енді перрондар мен терминалдарға қатысты жұмыстар жүріп жатыр. Бұл құрылыс кезеңі жыл аяғына дейін аяқталуы тиіс. Сонымен қатар, әуежайларға қажетті техникалық жабдықтарды сатып алу және орнату бойынша да жұмыс жүргізіліп жатыр", - деді әкім.

Сақтағановтың сөзінше, әуежайлар келесі туристік маусымның басында, шамамен сәуір–мамыр айларында, алғашқы рейстерді қабылдауға дайын болуы мүмкін.

Бұған дейін жарияланған мәлімет бойынша, әуежай Белқарағай ауылының маңындағы 266 гектар аумақта салынады. Жобада ұзындығы 2200 метр болатын ұшу-қону жолағы қарастырылған. Көлік министрлігінің мәліметінше, әуежайдың өткізу қабілеті сағатына 150 жолаушы болады.

Министр Марат Қарабаев Катонқарағайдан Астана, Алматы, Өскеменге, сондай-ақ Қытай мен Моңғолия бағыттарына халықаралық рейстер ашу жоспарланғанын айтқан. Сонымен қатар туристік нысандарға апаратын жолдарды жөндеу де көзделген.

Қазіргі уақытта Катонқарағайға жыл сайын шамамен 100 мың турист барады. Алдағы бес жылда бұл көрсеткіш 250 мың адамға дейін өсуі мүмкін.

2025 жылдың наурызында Зайсан әуежайының негізгі құрылыс жұмыстары басталғаны хабарланған. Әуежай Сатпай ауылының жанындағы бұрынғы әскери аэродромның орнында, Зайсаннан 25 шақырым жерде салынып жатыр. Нысан үшін шамамен 184 гектар жер бөлінген — орналасуы, климаты және жол қатынасы ескерілген.

Жобада ұзындығы 2200 метр ұшу-қону жолағы қарастырылған. Әуежай Bombardier Q400 және ATR-72 сияқты әуе кемелерін қабылдай алады. Инфрақұрылым құрамына төрт ұшаққа арналған перрон және сағатына 150 жолаушы өткізе алатын, аумағы 4 мың шаршы метр болатын аэровокзал кіреді.

Саяхат қызықтары мен пайдалы ақпаратты Instagram және Facebook парақшаларынан оқи аласыз!