Шымкент ішінара жарықсыз қалды: электр қуатының өшуі мыңдаған тұтынушыны қамтыды

Қазақстанның оңтүстігінде электр қуаты жаппай өшті. Шектеу Шымкент пен Түркістан, Жамбыл және Қызылорда облыстарына әсер етті, деп хабарлайды Tengrinews.kz тілшісі.

Шымкент әкімдігі баспасөз қызметінің мәліметінше, 14 тамызда сағат 14:37-де қаладағы кернеуі 110 киловольт электр желісінде әуе желілері ажыратылған. Нәтижесінде апатқа қарсы автоматика іске қосылды.

Электр қуатының өшуіне "KEGOC" АҚ магистральдық электр беру желілерінің апатты жағдайда ажыратылуы себеп болған. Қазіргі уақытта желілердің ажыратылу және апатқа қарсы автоматиканың іске қосылу мән-жайы анықталып жатыр.

Шымкентте Сәуле, Ақжар, Ақтас, Жанаталап, Тұрлан, Тельман, Коммунизм, сондай-ақ 17-ші, 18-ші және Отырар шағынаудандарында электр энергиясы ішінара өшірілді.

Жарықтың өшуі 38 760 жеке және 4 790 заңды тұлға саналатын тұтынушыға әсер етті.

Қалада уақытша 114,4 мегаватт жүктеме ажыратылды.

Түркістан облысында арнайы автоматты жүктемені ажырату жүйесі іске қосылды. Нәтижесінде 92,6 мегаватт жүктеме өшірілді.

Жамбыл облысында осы жүйенің әсерінен ажыратылған жүктеме көлемі 142 мегаватт болды. Бұл арнайы автоматиканың іске қосылуынан зардап шеккен төрт аймақ арасындағы ең жоғары көрсеткіш.

Қызылорда облысында арнайы автоматты жүктемені ажырату жүйесі 31,6 мегаватты өшірді.

KEGOC мәліметінше, сағат 14:37-де Оңтүстік өңірде апатқа қарсы қорғаныстың екі жүйесі - арнайы автоматты жүктемені ажырату жүйесі мен автоматты жиіліктік жеңілдету жүйесі іске қосылған.

Бұл жағдай кернеуі 500 киловольт болатын "Солтүстік – Оңтүстік" және "Солтүстік-Шығыс – Оңтүстік" электр беру желілері транзиттерінің бөлінуіне байланысты болды.

Арнайы автоматты жүктемені ажырату жүйесі жалпы алғанда 380,6 мегаватты өшірді. Оның ішінде Түркістан облысына - 92,6 мегаватт, Шымкентке - 114,4 мегаватт, Жамбыл облысына - 142 мегаватт және Қызылорда облысына - 31,6 мегаватт тиесілі болды.

Сонымен қатар ресми мәлімет бойынша, автоматты жиіліктік жеңілдету жүйесі іске қосылған. Оның әсерінен тағы 234,8 мегаватт жүктеме ажыратылды. Осылайша, апатқа қарсы автоматика қос жүйесінің жұмысы нәтижесінде өшірілген жүктеменің жалпы көлемі 615,4 мегаватт болды.

Алматы мен облысында 14 тамызда сағат 15:00 шамасында электр энергиясында іркіліс болды. Қаланың әртүрлі аудан тұрғындары жарықтың өшкені туралы хабарлады. Ресми мәлімет бойынша, KEGOC компаниясына тиесілі кернеуі 500 кВ әуе электр желілерінде апат болған.

Алматы облысы бойынша Жамбыл, Балқаш, Есік, Қарасай, Шелек, Райымбек, Ұйғыр, Іле, Кеген және Талғар аудандарында жарық сөнгені хабарланды.

"Алатау Жарық Компаниясы" АҚ мамандар тұтынушыларды электр қуатымен қамтамасыз етуді қалпына келтіру үшін қажетті шараларды жүргізіп жатқанын нақтылады. Алматыда Бостандық, Наурызбай, Әуезов және Алатау аудандарында жарық сөнгені ресми түрде расталды.

Алматыда электр қуатының өшуінен бағдаршамдар істен шығып, байланыс үзілді, қалада лезде кептеліс пайда болды. Қиылыстарға реттеушілер шықты.

Тағы оқыңыз: “Жарықты Канье өшірді ме?“: Алматыдағы блэкаутқа байланысты қазақстандықтар не деп жатыр?

Google News арқылы жаңалықтарымызды қадағалаңыз