Ресейде қолайсыз ауа райы салдарынан 3 адам қаза тапты, мыңдаған тұрғын жарықсыз қалды

Өңірде 2 мыңнан астам ағаш құлап, 1 мыңнан астам автокөлік зақымданды, 70 мыңнан астам адам электр қуатынсыз қалды.

РФ Гидрометорталығының хабарлауынша, Мәскеу өңірінде жауын-шашын тағы бір тәулікке созылады — синоптиктер 29 сәуірде жаңбыр мен қар аралас жауын-шашын күтілетінін болжап отыр.

Ресей астанасындағы ауа райына солтүстік-шығыс бағытта біртіндеп жылжып жатқан Балтық циклоны әлі де әсер етеді.

Осыған байланысты бүгінгі тәулікте қар аралас жаңбыр мен қар жауады, ал кей жерлерде сымдар мен ағаштарға жабысқақ қардың жиналу қаупі сақталады. Желдің екпіні жекелеген аудандарда секундына 17 метрге дейін жетуі мүмкін.

Осы уақытта 28 сәуірде Мәскеуде желдің екпіні секундына 20 метрге дейін жетіп, боран соғып, сымдар мен ағаштарға қар жабысып, көктайғақ сақталады. Қала тұрғындарына ағаштардың астына паналамауға және көліктерін олардың жанына қоймауға кеңес берілді.

Мәскеудің қалалық қызметтері боранның салдарын жоюды жалғастырып жатыр.

Бұдан бұрын Мәскеуге кейінгі 150 жылда болмаған қалың қар жауғанын жазғанбыз.