Шымкентте 18 мыңға жуық жүргізуші көлік салығын төлемеген

Шымкент қаласы бойынша Мемлекеттік кірістер департаментінің мәліметінше, 2025 жылғы салық кезеңі бойынша қалада жеке тұлғалардың меншігінде тіркелген 447 мыңнан астам көлік құралына жалпы сомасы 7,5 млрд теңге көлік салығы есептелген.

Салық кодексіне сәйкес, 24 мыңға жуық жеке тұлғаға 500 млн теңге көлемінде салықтық жеңілдіктер қарастырылған.

Ведомствоның мәлімдеуінше, 2025 жылға арналған көлік салығын төлеу мерзімі биылғы 1 сәуірде аяқталды.

Қала тұрғындарын хабардар ету мақсатында екінші деңгейлі банктердің мобильді қосымшалары, оның ішінде Kaspi және Halyk арқылы push-хабарламалар жіберілген.

– Есептелген соманы уақытылы төлемеген жағдайда әрбір кешіктірілген күн үшін өсімпұл есептеледі. Бір айлық есептік көрсеткіштен асатын берешек бойынша хабарлама табыс етілгеннен кейін 30 жұмыс күнінен соң салық бұйрығы шығарылып, 5 жұмыс күні өткен соң жеке сот орындаушыларына мәжбүрлеп өндіріп алу үшін жолданады. Сонымен қатар, берешек сомасы 40 АЕК-тен асқан жағдайда азаматтардың елден шығуына уақытша шектеу қойылуы мүмкін. Бұл ретте жеке сот орындаушылары қарыз сомасынан бөлек, өндіріп алу барысында қосымша 25%-ға дейін төлем өндіріп алады, – деді департаменттің бөлім басшысы Жұман Шерхан.

Департамент өкілдері жүргізушілерді артық шығындар мен келеңсіз жағдайлардың алдын алу үшін көлік салығын уақытылы төлеуге шақырды.

– Қазіргі таңда Шымкентте 17 987 жеке тұлғаның өткен жылдардан қалған жалпы сомасы 1 млрд 28 млн теңге берешегі бар. Аталған берешектер бойынша жеке сот орындаушылары тарапынан мәжбүрлеп өндіріп алу шаралары жүргізіліп жатыр, – деді спикер.

Бұдан бұрын Шымкентте 438 255 көлік тіркелгенін жазған едік. Оның ішінде ең көбі, яғни 379 132-сі – жеңіл автокөлік. Сонымен қатар, 152 867 көлік 20 жылдан астам уақыттан бері пайдаланылып келеді.

Бұдан бөлек, қала жолдарында 32 594 жүк көлігі, 6 309 автобус және 1 487 мотоцикл жүреді.