Шымкентте мемлекеттік ту ең биік тұғырға көтерілді

Шымкентте де Мемлекеттік Ту көтеру рәсімі өтті. Шара барысында ел рәмізіне құрмет көрсетіліп, Әнұран шырқалды. Салтанатты жиынға қала әкімі мен зиялы қауым өкілдері, депутаттар мен мемлекеттік қызметшілер, ерікті жастар қатысты.

Жалпыхалықтық мереке жастардың шеруімен басталды. Ту алған белсенді топ қала көшелерімен жүріп, оркестрдің сүйемелдеуімен мемлекеттік рәміздің мәртебесін асқақтатты. Патриоттық әндер шырқап, қастерлі нашандарға құрмет көрсетті.

Заңғар Нұржанбек, студент:

- Бүгінгі Республика күні ең жоғары деңгейде өтуде. Шымкент қаласы жастарын жинап, шеру жасап, осы алаңға келдік.

Басты алаңда Мемлекеттік Ту ең биік тұғырға салтанатты жағдайда көтерілді. Еркіндік пен бостандықтың кепілі болған ұлттық мерекенің мән-маңызы дәріптелді. Қатысушылар бірлік пен татулық, отанға деген сүйіспеншілік туралы үн қосты.

Серікбай Оңбай, ҚР Қарулы күштерінің ардагерлері РҚБ қалалық филиалының төрағасы:

- Президентіміз, жоғарғы бас қолбасшымыз Тоқаев Қасым-Жомарт Кемелұлы мұны заңдастырып, қайтадан мереке есебінде күнтізбемізге енгізді. Сондықтан бүгін - Ұлттық мереке. Біз қуаныштымыз. Әнұранымыз шырқалған кезде толқып, өзімді 38-40 жастағы жігіттей сезіндім.

Ел мерейін асыратын мерекеге жүздеген адам қатысты. Оның ішінде әлемдік аренада ел намысын қорғап жүрген спортшылар, ассамблея өкілдері мен азаматтық ұйым қызметкерлері де бар.

Әбдіманап Тұрған, қала тұрғыны:

- Еліміз тыныш, халқымыз аман болсын. Бейбіт заман болсын. Ұрпақтарымыз білімді де парасатты, ибалы болып, жақсы маман иесі болып өсе берсін.

Салтанатты жиын соңы концерттік бағдарламаға ұласты. Қатысушылар патриоттық әндер тыңдап, Республика күнімен бірін-бірі құттықтады. Ынтымағы жарасқан, бірлігі бекем ел екенімізді көрсетті. 

Авторлары: Нұрсұлтан Мұхамеджан, Нұрмахан Мұсатов, Нұрмахан Бекмұратов