Шымкентте нәрестелердің жүрегіне операция жасалды

Шымкентте жаңа туған 5 нәрестенің жүрегіне күрделі операция жасалды.

Сирек кездесетін диагнозы бар сәбилерді емдеуге Беларуссиялық кардиохирургтар арнайы шақыртылып, шеберлік сабағы ұйымдастырылды. Жергілікті дәрігерлердің кәсіби біліктілігін арттыру мақсатында жүректегі қарынша аралық тесіктердің үлкеюі, артерияның тарылуы және бірнеше патологиясы бар науқастар таңдалды. 

Ақерке Бірәлиеваның сәбиі жоғары технологиялық операциядан кейін туа біткен жүрек ауруынан айықты. Дәрігерлер екі айлық шақалақтың жүрегіндегі қарыншааралық пердені арнайы әдіспен қалпына келтірді. Қазір баланың жағдайы жақсы, ұйқысы да тыныш.

Ақерке Бірәлиева, Түркістан облысының тұрғыны:

- Қызымның «отдышкасы» бар ауырып қала беретін. Кішкене сыртқа шықсақ та, тексеруге апарсам да солай болатын. Сосын шұғыл түрде осы емханаға қаралдық. Ота жасалды. Сәтті өтті. Қазір қызым жақсы. Кеше қасыма берілді.

Сала мамандарының айтуынша, сәби жақын күндері үйіне шығарылады. Сонымен қатар беларуссиялық кардиохирургтардың жетекшілігімен тағы осындай төрт балаға ашық операция жасалып, жүрек ауруларын емдеудің заманауи әдістері ұсынылды. Халықаралық әріптестіктің арқасында жергілікті мамандарының кәсіби біліктілігін арттыруға мүмкіндік туды.

Юрий Линник, Минск қалалық Балалар хирургиясы республикалық ғылыми-практикалық орталығының бөлім меңгерушісі:

- Баланы шұғыл жағдайда бас қалаға жеткізу әрдайым мүмкін бола бермейді. Сондықтан республикалық маңызы бар қалада да балалар кардиохирургиясын дамыту қажет. Ал жалпы Қазақстанда алып қарасақ медицинаның деңгейі жоғары.

Қалалық клиникалық балалар ауруханасында күрделі хирургияны дамытуға ерекше көңіл бөлініп отыр. Осы мақсатта дәрігерлердің тәжірибе алмасуына жағдай жасалып, емдеудің заманауи технологияларын меңгеруге жан-жақты қолдау көрсетіледі. Нәтижесінде туа бітті жүрек ауруына шалдыққан балаларға жасалатын озық операциялар саны артпақ. 

Асан Жұманов, қалалық Клиникалық балалар ауруханасының бөлімше меңгерушісі:

- Өте күрделі диагноздармен туған нәрестелерге шұғыл түрде ота қажет болады. Ота жасалмаған жағдайда өкінішке қарай шетінеп кету қаупі өте жоғары. Статистика бойынша былтырғы жылы бізде 50-ден аса науқасқа ота жасалу керек болған. Ал биылғы жылы Шымкент қаласы бойынша 50-70 бала шамасында ота жасалу қажет.

Биыл балалар клиникалық ауруханасында жасалатын операцияларға жаңа әдістер енгізілмек. Осы мақсатта қанды оттегімен қанықтырып, жүрек пен өкпе қызметін уақытша атқаратын заманауи құрылғы сатып алынады. Бұл науқастардың тезірек сауығып, ауырсынуын азайтуға мүмкіндік береді.

Авторлары: Нұрсұлтан Мұхамеджан, Нұрмахан Бекмұратов, Нұрмахан Мұсатов