Шымкентте бауыр және бүйрек трансплантациясы бойынша 39 операция жасалды

Шымкентте жыл басынан бері бауыр және бүйрек трансплантациясы бойынша 39 операция жасалды.

Облыстық клиникалық аурухана дәрігерлері жыл соңына дейін тағы 4 операция жасауды жоспарлап отыр. Осылайша созылмалы сырқатқа шалдыққан жандар алыстан ем іздемейді. Мамандар донорлар мен реципиенттердің операциядан кейінгі жағдайын бақылап отырады. 

Лесбек Бейтанов гемодиализге тәуелді 26 жастағы ұлының өмірін сақтап қалу үшін бір бүйрегін беруге шешім қабылдады. Медициналық тексеруден сәтті өткен ол, донор болуға ресми рұқсат алды. Қазір әке мен балаға операция алдында психологиялық қолдау көрсетіліп, дайындық жүргізіліп жатыр.

Лесбек Бейтанов, донор:

- Анализдер бәрі дұрыс шықты. Тексерудің бәрінен өттік. Дұрыс сәйкес келгеннен кейін беруге ризашылығымды бердім. Баламның өміріне алаңдадым. Жас, әлі бойдақ. Өмірін беріп, жақсы болып кетуіне үлес қосқым келеді.

Былтыр өңірде алғаш рет жүрек трансплантациясы сәтті жүзеге асты. Мәйіттік донордан алынған жүрек 59 жастағы Кеңесбай Дәрменовке салынды. 5 сағатқа созылған күрделі операциядан кейін ауруынан  айыққан.

Кеңесбай Дәрменов, реципиент:

- Қазіргі жағдайда жақсы. Жүрек ақауынан ешқандай белгілер жоқ. Жақсы сезініп жүрмін. Жағдайым дұрысталды. Шүкір. Аптасына, айына барып тексеріліп, қаралып тұрамын.

Облыстық клиникалық аурухана базасында жыл басынан 37 бүйрек, 2 бауыр трансплантациясы жасалды. Жыл соңына дейін тағы 4 операция жоспарланып отыр. Мамандардың айтуынша, медициналық жетістіктер донорлыққа қатысты қоғамдық түсінікті қалыптастыруға ықпал етеді.

Жанболат Ділдәбеков, облыстық клиникалық аурухананың бас дәрігері:

- Бізде мәйіттік трансплантация дамитын болса бізде трансплантацияға душар немесе шалдыққан күту парағындағы науқастардың саны азаятын еді. Қазіргі жағдайда күту парағында 4 мыңнан астам азамат тұр. Олардың барлығының туыстарында сәйкес келетін донор жоқ деген сөз. 

Қолданыстағы заң бойынша мәйіттік донор тек бас-ми өлімі тіркелген жағдайда ғана рұқсат етіледі. Дәрігерлердің айтуынша, мәйіттік донор жүйесін дамыту арқылы жыл сайын мыңдаған адамның өмірін сақтап қалуға болады. 

Нұрсұлтан Мұхамеджан, Нұрмахан Бекмұратов