Қазақстанда 800 рет бүйрек трансплантациясы бойынша ота жасалды

АСТАНА, 4 маусым – Sputnik. Денсаулық сақтау министрлігінің хабарлауынша, Сызғанов атындағы хирургия ғылыми-зерттеу институтында 800-ші рет бүйрек трансплантациясы бойынша операция жасалды.

"Операция академик Болатбек Баймахановтың жетекшілігімен жасалды. Пациент созылмалы бүйрек жеткіліксіздігінің соңғы сатысына шалдыққан 14 жастағы қыз болды", - деп жазылған хабарламада.

Денсаулық сақтау министрлігі соңғы бір жыл ішінде оның өмірі перитонеальді диализбен тығыз байланысты болғанын хабарлады. Бұл өмір сапасын айтарлықтай шектейтін, бірақ адамның амандығы үшін маңызды процедура.

"Қыздың анасы донор болуы бұл операцияға өзгеше мән береді. Қызын құтқару үшін әйел бір бүйрегін беруді шешті", - делінген мәлімдемеде.

Қазір пациенттің жағдайы тұрақты деп бағалануда. Оны алда оңалту кезеңі күтіп тұр, одан кейін ол толыққанды өмірге орала алады.