Қазақстанда 4506 пациент бүйрек трансплантациясы бойынша күту парағында тұр

АСТАНА, 27 наурыз – Sputnik. Қазақстанда қазіргі уақытта бүйректі трансплантаттауды күту парағында 4506 пациент тұр, деп хабарлады денсаулық сақтау министрлігі.

Денсаулық сақтау министрлігі созылмалы бүйрек ауруын ерте анықтау пациенттердің денсаулығы мен өмірін сақтаудағы негізгі фактор екенін жеткізді.

Бүгінде бүкіл әлем бойынша 800 миллионнан астам адам осы аурумен күресіп жатыр. Мамандардың бағалауынша, әлемде әрбір оныншы адам осы дерттен зардап шегеді.

"Қазіргі уақытта бүйректі трансплантаттауды күту парағында 4506 пациент, оның ішінде 123 бала бар", - деп жазылған хабарламада.

Елімізде нефрологиялық көмекті жетілдіру мақсатында жүйелі шаралар кешені жүзеге асырылып жатыр, дейді министрлікте. Атап айтқанда, "UMC" корпоративтік қоры базасында консервативтік нефрология, диализ және трансплантаттауды біріктіретін Республикалық нефрология орталығы құрылды.

2026 жылдан бастап облыстық ауруханаларды жаңғырту жұмыстары басталды. Оның аясында нефрологиялық бөлімшелер мен мамандандырылған жатын орындар ашу, сондай-ақ Ақтөбе, Алматы, Қостанай, Маңғыстау және Жетісу облыстарында амбулаториялық-кеңес беру орталықтарын кеңейту көзделген.