Атырауда алғаш рет салмағы 700 және 800 грамдық нәрестелердің жүрегіне ота жасалды

Атырау облыстық перинаталдық орталығында алғаш рет «ашық артериалдық өзек» диагнозы қойылған шала туған нәрестелерге күрделі кардиохирургиялық оталар жасалды. Әр баланың салмағы 800 грамнан аспаған. Ақтөбелік кардиохирургтер мен жергілікті мамандардың бірлескен жұмысының арқасында екі ота да сәтті өтті, – деп хабарлайды Aikyn.kz тілшісі. 

Ота шамамен екі сағатқа созылды. Отаны Ақтөбеден арнайы шақырылған кардиохирургтер – Ануар Досмағанбетов пен Мөлдір Мұрат орындады. Команда құрамында анестезиологтер Алишер Абатов пен Гүлжазира Ережепова, сондай-ақ неонатологтер Гүлмира Мерхатқызы, Алмагүл Байғалықызы, Руслан Сабырханұлы, Аслан Асанұлы және Гүлбаршын Отарғалықызы болды.

Ота жаңа ашылған неонаталдық хирургия бөлімшесінде жүргізілді. Дәрігерлердің жоғары біліктілігі мен заманауи жабдықтың арқасында оталар сәтті өтті. Қазір екі сәби де дәрігерлердің бақылауында, жағдайлары тұрақты деп бағалануда.

Еске сала кетейік, дүниежүзінде жыл сайын 15 миллион сәби шала туады. Қазақстанда жыл сайын орта есеппен барлық жаңа туған нәрестелердің 20-22 мыңы шала туады.

Баян Жанұзақова