Шымкентте План Ш фильмінің тұсаукесері өтті

Қазақ кино өндірісінде жаңа комедия. Шымкенттегі Kino-plexx 9 City Mall орталығында «План Ш» атты толықметражды фильмнің тұсаукесері өтті. Сатира және қалжыңнан құрылған тың туынды, бүгіннен бастап елдегі барлық үлкен экранға жол тартты. Комедияда басты кейіпкерлерді, әзіл-сықақ театрларының танымал әртістері сомдайды. Әрбір көрініс көрерменді күлдіре отырып, терең мағына береді.

Кинокартинаның тұсаукесері ерекше форматта ұйымдастырылды. Оған шығармашылық топ, режиссер мен актерлер қатысып, фильмнің мазмұны және көтерген тақырыбы жайлы ойлар айтты. Көрерменмен ашық диалог орнап, туындының мән-маңызы түсіндірілді.

Дәурен Жұмаділов, идея авторы:

- Недеген актерлер ойнап жатыр. Уәлибек ағамыз, Жүсіп аға, Бауыржан аға, Берік аға. Одан кейін тіс қаққан жайдарманшылар. Бәрі жабылғанда әдемі шығады деп сеніп отырмын. Біз үшін өте қызық дүние болды. Өйткені бәрінің аузында қалжыңы барлар ғой.

Сюжет желісінде бойдақ Еркін достарын курорттық демалысқа шақырады. Алайда әрқайсысы үйден шығу үшін әйеліне түрлі сылтаумен өтірік айтуға мәжбүр болады. Көңілді басталған кеш күтпеген оқиғаларға ұласады. Осылайша «Шымкент шоу» театры сахнасында көптің көңілінен шыққан интермедия толықметражды комедия форматында қайта түрленді.

Жүсіп Ақшора «Шаншар» әзіл-сықақ театрының әртісі:

- Әзілді мына қырынан да, мына қырынан да өмірдің қай саласына да салып, көрсетуге болады. Енді көрермен көріп отырып, интермедияны қарап, осындай көлемді бір шығарма етіп шығаруға болатынын біледі.

Max Films студиясы ұсынған жаңа комедия көрерменді күлкіге қарық қылады. Сатира саңлақтары сценарий желісіне сай қызықты әрі шытырман оқиғаларда өз образын сәтті сомдап, көркем жеткізуге тырысқан. «Әзіл мен терең мағыналы сәттер туындыны тартымды етті», - дейді идея авторы.

Мақсат Оспанов, фильм режиссері:

- Әзілмен астарлап, қазіргі отбасыларымыздың арасында болып жатқан оқиғаларды суреттедік. Көрермендерге жаңа жылдың қарсаңында күлкі сыйлайық деген ойда болдық.

Отбасы құндылығы мен адами қасиеттерді насихаттайтын комедия бүгіннен бастап елдің барлық кинотеатрында көрсетіле бастайды. 

Авторлары: Нұрсұлтан Мұхамеджан, Нұрмахан Мұсатов, Нұрмахан Бекмұратов