Елордада Әміре музыкалық драмасының тұсаукесері өтті

Еуропада қазақша ән шырқап, кәрі құрлықты таңдай қақтырған тұңғыш қазақ кім? Білесіз бе? Ол осыдан 1 ғасыр бұрын сиқырлы үнімен, кең диапазонды дауысымен бүкіл Франция елін «аузына қаратты». Мұхтар Әуезов оған: «арық» әндерді де «семіртіп, жұтындырып, құлшындырып жібереді», – деп баға берген.

Иә, бұл Әміре Қашаубаев. Бүгінде әншінің Парижде ән салғанына тура 100 жыл. Осыған орай елордадағы Музыкалық жас көрермен театры «Әміре» музыкалық драмасының премьерасын ұсынды.

Музыкалық драмада өнерпаздың өмірі мен өнері суреттелген. Режиссер Асхат Маемиров қойылымда әншінің жеке трагедиясын, өнерді шектеу, сирек туатын дарынды тұсау, тұтас бір ұлттың өнерін қорлау сынды өзекті тақырыптарды көрсеткен. Әміренің Қоянды жәрмеңкесінде ән салуы, оның Парижге баруы, ол жақта Мұстафа Шоқаймен кездесуі де музыкалық драмада көрініс тапты. Қойылымда Әміренің рөлін актер Оразалы Игілік сомдайды.

«Жалғыз арша» дәстүрлі әншілер байқауы  

Биыл Семейдегі Әміре Қашаубаев атындағы мемлекеттік филармонияға 80 жыл толды. Мерейтойға орай облыс орталығында өнер апталығы басталды. Апталық шымылдығы «Жалғыз арша» республикалық дәстүрлі әншілер байқауымен ашылды. Сайысқа елдің әр өңірінен 40-қа тарта дәстүрлі ән өнерінің өкілі қатысты. Олар екі кезең бойы өнер көрсетіп, дәстүрлі мектептің талаптарына сай орындаушылық шеберліктерін паш етті. Сайысты 7 мүшеден тұратын қазылар алқасы бағалады. Жалғыз арша байқауының жеңімпазы апталықтың соңғы күні белгілі болады. Әміре әнін қалықтатқан өнер апталығы 6 желтоқсанға дейін жалғасады. Қазақты әлемге танытқан Әміренің дауысы зор, диапазоны кең. «Сондықтан байқаудың басты талабы әнді микрафонсыз айту болды», – дейді ұйымдастырушылар.

Бүгін Ғазиза Әбдінәбиеваның туған күні

«Хабар» арнасы ұсынған «Тоғысқан тағдырлар» сериалындағы «Роза апай» естеріңізде ме? Бұл талантты актрисаның көрермен жүрегінен орын алған жарқын образдарының бірі еді. Әу баста шағын эпизодтық рөл болады деп жоспарланған Розаның образы Ғазиза Әбдінәбиеваның актерлік шеберлігінің арқасында тұтас бейнеге айналады.

Иә, қалың көрерменге Роза апай деп танылған тұмса таланттың бүгін туған күні. Ғазиза Әбдінәбиева тірі болса, жетпістің жетеуін алқымдар еді. Бүгінде актрисаның есімі ұлттық кино және театр тарихында қатталып қалды. Ғазиза Әбдінәбиева қазақ өнерінде 50 жылға жуық еңбек еті. Осы уақыт аралығында ол 20-дан аса кинофильмдерде, 25-ке тарта спектакльде рөл сомдап, шеберлігін танытты. Актрисаның қазақ өнерінде сақталған ойлы бейнесі мен дауысы ел есінен кетпейтіні анық

«Мюзикл әлеміне саяхат»    

Елордалықтар мюзикл әлеміне саяхаттады. «ASTANA MUSICAL» театры мерейтойлық оныншы маусымында мерекелік кеш ұйымдастырды. Көрерменге танымал мюзиклдерден таңдалып алынған үздік көріністер, сахна шеберлерінің қатысуымен өтетін ерекше қойылымдар мен үздік хореграфиялар ұсынылды. Көрермен «Достар серті», «Роза Бағланова», «Алдар көсе» және әлемге әйгілі «Moana», «Mamma Mia», Romeo мен Juliet», «Aladdin» сынды мюзиклдардың ең әсерлі сәттерін тамашалады.

Атырауда табылдының әндері шырқалды

Кеше Индерборда жергілікті 60 гитарашы атырапты жаңғыртып Табылдың әнін шырқады. Бұрын соңды 60 гитарашының оркестр құрғаны тарихта болған ба, болмаған ба – беймәлім. Белгілісі буырқанған Табылды туған жерінде әнімен, сазымен, гитараның сиқырлы үнін ғана емес, гитарашылардың шабытын ашып, өз жерінде де бір буын қалыптастырып кеткені анық. Биыл қазақтың тұңғыш әрі жалғыз бард ақыны Табылды Досымовтың туғанына 60 жыл. Жерлестері – индерліктер сол 60 жылдықтың құрметіне Табылды ескертікшінің жанында күркіретіп маңғыстаулық шайыр Светқали Нұржанның сөзіне жазылған, Табылдың «Сәйгүлік» әнін орындады.