Шымкентте полицей әріптестерінен қашуға тырысты. Көлікті тексергеннен кейін ол жұмыстан шығарылды

Шымкентте есірткіні заңсыз сақтау дерегін анықтау бойынша жүргізілген операциядан кейін полиция қызметкері теріс себептермен жұмыстан шығарылды, деп хабарлайды Tengrinews.kz. Полиция қызметтік Kia көлігінен мефедрон табылды деген ақпаратқа қатысты пікір білдірді.

Бұған дейін БАҚ-та құқық қорғау органдары мемлекеттік нөмірі жоқ Kia көлігін тоқтатпақ болғаны туралы ақпарат тараған еді. Жүргізуші полицияның қызметтік көлігін соғып, қашып кетпек болған. Көлік арнайы жасақ (СОБР) қызметкерлерінің көмегімен тоқтатылды.

Мәліметтерге сәйкес, көлік тізгінінде Еңбекші ауданының полиция қызметкері болған, салон ішінде тағы екі адам отырған. Көлік қызметтік болып шықты және тінту кезінде оның ішінен үш грамға жуық мефедрон табылды.

Tengrinews.kz редакциясы Шымкент полиция департаментінің баспасөз қызметіне сауал жолдады. Онда Шымкент ПД Ұйымдасқан қылмысқа қарсы күрес басқармасының қызметкерлері жедел іс-шара барысында есірткі заттарын заңсыз сақтау дерегінің жолын кескенін хабарлады.

"Іс-шара барысында автокөлікте азаматтық тұлғалармен бірге аудандық полиция бөлімшелері бірінің қызметкері болғаны анықталды. Бұл қызметкер ішкі істер органдарынан теріс себептермен шығарылды", - деп хабарлаған Шымкент ПД баспасөз қызметі бұрынғы полицей қазір ұсталды ма, жоқ па нақтыламады.

Ресми мәліметтерге сәйкес, қажетті тергеу амалдары жүргізіліп жатыр.

"Оқиғаның мән-жайына, соның ішінде бұрынғы полиция қызметкерінің әрекетіне құқықтық баға беріледі", - деп атап өтті полиция өкілдері.

Өзге ақпарат Қылмыстық іс жүргізу кодексінің 201-бабына сәйкес тергеу мүддесіне байланысты жария етуге жатпайды.

Бізді Google-дың негізгі дереккөздер тізіміне қосыңыз