77 жастағы әженің қабырғасын сындырған полицей жұмыстан шығарылды

Алматы облысында 77 жастағы зейнеткерді үйінен күштеп шығарған полиция қызметкері жұмыстан босатылды. Бұл туралы ақпаратты тележүргізуші Динара Сәтжанның QOGAM news Telegram арнасы жазды, – деп хабарлайды Аikyn.kz

Қайғылы оқиға 2 қазан күні Іле ауданы Өтеген Батыр кентінде болған. Видеодан полиция қызметкерлері кейуанаға “Шығамыз, ештеңе алмайсыздар” деп пәтерден итеріп, шығарып жатқанында  77 жастағы әже  баспалдақтың қоршауына соғылған. Кейуананың кейіннен қабырғасы сынғаны анықталды. Бұл сәт видеоға түсіп қалып, әлеуметтік желіде қоғамдық резонанс тудырған болатын.

ІІМ басшысы Ержан Сәденовтің хабарлауынша, әжейге күш көрсеткен қызметкер ішкі істер органдарынан шығарылды. Сонымен қатар  оның тікелей басшыларына қатысты да тәртіптік тексеріс басталды.

Еске сала кетейік, видео тараған күні Алматы облысы Полиция департаментінің бастығы Мейрам Әбікеев әжеге дөрекілік көрсеткен қызметкерге қатысты тергеу тағайындалғанын хабарлаған болатын.