Ақтауда Қазпошта арқылы героин алған күдіктілер полициядан қашуға тырысты

Ақтау қаласында есірткі тасымалымен айналысқан екі адам ұсталды. Олар «Қазпошта» бөлімшесінен ішінде есірткісі бар сәлемдемені алып, кейін полициядан қашпақ болған, деп хабарлайды Arasha.kz.

Күдіктілер полицияның тоқтау туралы талабына бағынбай, көлікпен қаша жөнелген. Қудалау кезінде олар қылмыстық айғақты жасыру үшін пошта сәлемдемесін жолға лақтырып жіберген. Соңында күдіктілер жол-көлік оқиғасына ұшырап, көлікті тастап жаяу қашпақ болған жерінен қолға түсті.

Лақтырылған сәлемдеменің ішінен салмағы шамамен 400 грамм героин табылды. Медициналық куәландыру ұсталғандардың қанында есірткі заттары бар екенін растады.

Есірткі заттарын заңсыз тасымалдау фактісі бойынша қылмыстық іс қозғалды. Көлік жүргізушісіне есірткіге мас күйінде көлік басқарғаны үшін әкімшілік жаза тағайындалып, автокөлік айып тұрағына қойылған.

Екі азамат та есірткіні медициналық емес мақсатта тұтынғаны үшін арнайы қабылдау орнына орналастырылды.