Шымкентте тұрғындар арақ шараптан бас тартып келеді

Шымкентте осымен бесінші шағын аудан арақ атаулыдан бас тартты. Жергілікті дүкендерде алкогольдік өнімдер сатылымнан мүлде жойылды. 

Осылайша, қылмыс пен бұзақылық тыйылған. Азаматтық қоғам өкілдері бұл бастаманы өңір жұртына үлге етіп, өзге шағын аудандарда да кеңінен насихаттамақ. 

Ауыл белсендісі Төрехан ақсақалдың шаңырағы татулық пен тәрбиенің ордасы. Дастарханнан ұлттық тағам мен дәмді тоқаш үзілмейді. Бұған дейін осы үйде қариялар бас қосып, жастарға үлгі болар маңызды шешім қабылданды. Содан бері маңайдағы дүкендерде алкоголь өнімдері сатылымнан алынып, ұрпақ тәрбиесіне ерекше көңіл бөліне бастады.

Төрехан Пернебаев, қала тұрғыны:

- Бұл елде ішімдіктің тоқтағанына біраз жыл болып қалды негізі. Соған қуанамыз. Соған мақтанамын. Той-томалақ тыныш өтеді. Дастарханымыз берекелі, дастарханымыз мерекелі. Ұл-қыздарымыз бізден үлгі алғаннан кейін олар қайда барсын!?

Жиделі шағын ауданында үш мыңнан аса адам тұрады. Төңіректегі дүкен иелері ауыл жұртының ауызбіршілігінен кейін сауда сөрелерінен ащы суды алып тастады. Керісінше, әр жұма сайын нан өнімін тегін таратып, қайырымдылыққа бет бұрды. 

Айман Жақыпбаева, дүкенші:

- Алкогольсіз сауда істеген жақсы. Қазір көп магазиндерде жоқ негізі. Байқап қарасаң көбі сатпайды. Ішімдік болмаса кәдімгідей ауыл тыныш, бәрі тыныш. Жиделіде құқық бұзушылық жоқ. Бәрі жақсы. 

Жиделідегі жақсы бастама ресми түрде қолдау тапты. Ішімдіктен бас тарту туралы шешім меморандуммен бекітілді. Құжатқа жергілікті билік, полиция және кәсіпкерлер қол қойды. 

Меруерт Тұтқышбаева, Абай аудандық әкімдігінің бөлім басшысы:

- Бұл меморандум әлеуметтік жауапкершілік аясында осы елді мекенде құқық бұзушылықты алдын алу мақсатында өздері келісіп отыр. Ауданымыздың мектептерінде отбасы құндылықтарын дәріптеу, ата-анаға деген құрметті көтеру бойынша тұрақты түрде түсіндіру жұмыстары, насихаттық жұмыстар жүргізіледі. 

Игі бастама өзге шағын аудандардан да қолдау тапты. Азаматтық келіссөздердің нәтижесінде Шапырашты, Көкбұлақ, Бозарық және Ынтымақ-2 тұрғындары да алкоголь өнімдерінен бас тартуды жөн көрген.

Авторлары: Нұрсұлтан Мұхамеджан, Нұрмахан Бекмұратов, Нұрмахан Мұсатов