Шымкенттегі 21 жастағы қызды пышақтап өлтірген күдіктіге қатысты сұмдық жайт мәлім болды

Шымкент қаласында 11 қаңтар күні кешкі уақытта қаза тапқан Нұрай Серікбайтың өліміне байланысты қылмыстық іс бойынша күдіктіге тағылған айыптың бірі ауырлатылды. Бұл туралы адвокат Аянхан Омаров мәлімдеді, деп хабарлайды Qaz365.kz.

Адвокаттың айтуынша, тергеу барысында іс Қылмыстық кодекстің 99-бабының 2-бөлігі 5-тармағына – аса қатыгездікпен жасалған адам өлтіру бабына қайта сараланған. Аталған бапқа сәйкес, күдікті 15 жылдан 20 жылға дейін немесе өмір бойына бас бостандығынан айырылуы мүмкін.

"Нұрайдың ісі бойынша Қылмыстық кодекстің 99-бабының 2-бөлігі 5-тармағына (аса қатыгездікпен жасалған адам өлтіру) ауысты. Әділдік жолындағы жұмысымыздың нәтижесі деп есептейміз! Шымкент қаласы Полиция департаменті бастығының тергеу жөніндегі жаңадан тағайындалған орынбасары Е.Ережепов пен Тергеу басқармасының бастығы Ж.Құлмаханға ризашылығымды білдіремін! Енді іс бойынша толықтылық пен жан-жақтылық қамтамасыз етіледі деп сенеміз", – деді Омаров.