Шымкенттің экономикалық өсімі 15 пайызға жетті

Биылғы 10 айда Шымкент қаласының экономикалық өсімі 15 пайызға жетті. Оның ішінде, сауда көлемі 25 пайызға жуықтаса, өнеркәсіп өнімі 14,7 пайызға өсті. Ал құрылыс жұмыстары –  7, инвестиция – 4,7 пайызға артты. Сондай-ақ шаһарда 982 мың шаршы метр тұрғын үй пайдалануға берілді.

Соңғы үш жылда қала экономикасына 2 трлн теңгеден аса инвестиция тартылды. Оның 75 пайызы –  жеке инвесторлар есебінен. Шымкент қаласы әкімінің айтуынша алдағы бес жылда шаһарға 6,6 трлн теңге инвестиция тартылмақ. Қазірдің өзінде жалпы құны 4,6 трлн теңге болатын 221 инвестициялық жобаның пулы жасақталған. Нәтижесінде, 29 мыңнан аса жаңа жұмыс орны құрылады.

Ғабит Сыздықбеков, Шымкент қаласының әкімі:
- Былтыр «Alsera KZ» түрік компаниясымен елімізде құны 322 млрд теңгені құрайтын ең үлкен заманауи жылыжай кешенінің құрылысы басталды. Бүгінде құны 98 млрд теңгені құрайтын бірінші кезеңінің құрылысы аяқталып, 42 гектар жылыжайдан алғашқы өнім алынды.

Шымкентте үш ауысымды мектептер мәселесі толығымен шешілді. Биыл «Келешек мектептері» жобасы аясында 12 мектеп бой көтерді. Сондай-ақ 4 145 орындық сегіз мектептің құрылысы жүргізіліп, оның екеуі қолданысқа берілді. Денсаулық сақтау саласында да ілгерілеу бар.

Ғабит Сыздықбеков, Шымкент қаласының әкімі:
- Соңғы үш жылда жаңадан 14 медициналық мекеме ашылып, емханалардың орташа жүктемесі 25 мыңнан 21 мыңға дейін азайды. Медициналық ақпараттарды автоматты түрде талдап, қатерлі ісіктерді, өкпе ауруларын, жүрек-қантамыр жүйесі патологияларын ерте анықтайтын «PACS Systems» жасанды интеллект ақпараттық жүйесі енгізілді.

Шымкент тұрғындарының 99,9%-ы ауызсумен, 100%-ы электр энергиясымен, 98%-ы табиғи газбен қамтылды. Бұдан бөлек, 982 мың шаршы метр тұрғын үй бой көтеріп, мың шақырымға тарта жолға асфальт төселді.

Авторлары: Әлішер Әли