ШОБ өсімі: 5 жылда ЖІӨ дегі үлес 7 пайызға артты

2025 жылдың қорытындысы бойынша шағын және орта бизнес (ШОБ) Қазақстан экономикасының шамамен 40 пайызын қалыптастырды.
Бұл көрсеткіш 2020 жылмен салыстырғанда 7 пайызға жоғары. Мұндай мәліметті «Атамекен» Ұлттық кәсіпкерлер палатасы президиумының төрағасы Қанат Шарлапаев мәлімдеді.

Оның айтуынша, ШОБ ел экономикасының негізгі қозғаушы күштерінің біріне айналған. Қазіргі таңда бұл секторда экономикалық белсенді халықтың 50 пайыздан астамы, яғни 4,7 миллион адам жұмыспен қамтылған.

Соңғы бес жылда шағын және орта бизнес өкілдерінің саны 1,6 есеге артқан. Дегенмен, орта бизнестің даму қарқыны баяулап отыр. Бұл шағын кәсіпорындардың ірілену процесінде бірқатар қиындықтар бар екенін көрсетеді.

Саладағы еңбек өнімділігі де әркелкі: шағын бизнесте бір қызметкер жылына орта есеппен 7,4 млн теңге өнім өндірсе, орта бизнесте бұл көрсеткіш 15,9 млн теңгеге жетеді.

Мамандар кәсіпкерліктің дамуына қаржыға қолжетімділіктің шектеулі болуы, банктік несиелердің қымбаттығы, салықтық және реттеуші ортаның тұрақсыздығы, сондай-ақ кадр тапшылығы кері әсер етіп отырғанын айтады.

Бүгінде елімізде 1,7 миллионнан астам жеке кәсіпкер тіркелген.