Сібір өзендерін Аралға бұруға бола ма?

Сібір өзендерін Орталық Азияға бұру мәселесі әзір қаралмайды. Мамандар: «Бұл бастаманың шығыны тым көп, экологияға қаупі басым», - дейді. 

Дегенмен өңірдегі су тапшылығы мәселесі күн тәртібінен түскен жоқ. Қазір сарапшылар жағдайды бақылап, өзен-суын бұрудың ықтимал жолдары мен салдарын зерттеп жатыр. Бұл жоба алғаш 1970-ші жылдары ұсынылған. Ол уақытта Обь, Ертіс, Тобыл мен Есіл өзендерінен Арал теңізіне дейін су жеткізетін арна салу жоспарланған. Су Қазақстан мен Орталық Азия елдерін, сондай-ақ Ресейдің кей аймақтарын қамтуы керек болған. Алайда жоба экологиялық қатерлерге байланысты 1986 жылы тоқтатылды. Бұл мәселе кейін де ара-тұра көтерілгенімен, сын-қатерлер мен қауіп басым болуы себепті кейінге қалып келеді. 

Михаил Болгов, гидролог, су ресурстарын кешенді пайдалану маманы:

- Орталық Азия елдері су саясатын оңтайландыруы тиіс. Жаңа технологияларға көшу, суды үнемдеуді қамтамасыз ету және ресурстарды баршаға жететіндей басқару қажет. Халық саны артып, су мүлде жетпеген жағдайда ғана суды бұру  мәселесін көтеруге болады. Алайда бұл болашақтың еншісіндегі тақырып, себебі қазір мұндай жобалар аса қымбатқа түседі.