Сотталған блогер Жаңабыловтың фотосы дау тудырды ІІМ не деп жауап берді

Әлеуметтік желілерде сотталған блогер Ерболат Жанәбіловтың демалыста түскен суреттері қызу талқыға түсіп, көпшілік оны сот тыйымына қарамастан Қазақстаннан кетіп қалуы мүмкін деп болжады. Tengrinews.kz ІІМ Қылмыстық-атқару жүйесі комитетінен ер адамның қайда екенін және шектеуді бұзған-бұзбағанын анықтады.

"Сотталғандарға елден шығуға тыйым салынады": не болды?

Сотталған блогер Ерболат Жанәбілов әлеуметтік желіде демалыста түскен суреттерін жариялады. Алайда олардың нақты қай жерде және қашан түсірілгені белгісіз.

Осыдан кейін желі қолданушылары сот елден шығуына шектеу қойғанына қарамастан, ол шетелге кетіп қалуы мүмкін деп топшылады.

"Ұтыс ойындарын заңсыз өткізіп, сотталған блогер Жанәбілов естеріңізде ме? Қараңыздаршы, демалыста немесе теңіз жағасында түскен суретін жүктепті. Сотталғандарға елден шығуға тыйым салынатынын естеріңізге саламын", – делінген Threads желісіндегі жарияланымдардың бірінде.

Бұл жазба мыңдаған лайк пен жүздеген пікір жинаған. Дегенмен кейін автор жарияланымды өшіріп тастады.

Фото: Stories instagram.com/zhanabylov_e

Кейін Жанәбіловтың Instagram парақшасында балаларымен бірге жағажайда уақыт өткізіп жатқан жаңа кадрлар пайда болды. Бұл ретте жарияланымдар бойынша суреттердің нақты қай жерде түсірілгенін анықтау мүмкін емес.

Tengrinews.kz Жанәбіловтың елден шыққан-шықпағанын білу үшін ІІМ Қылмыстық-атқару жүйесі комитетіне (ҚАЖК) жүгінді.

ҚАЖК не дейді?

ҚАЖК Жанәбіловтың Қазақстанда екенін хабарлады. Ол пробация қызметінің есебінде тұр және оның ел аумағынан шығуға құқығы жоқ. Ал республика ішінде жүріп-тұруына тыйым салынбаған.

"Сот белгілеген шектеулерге сәйкес, оған Қазақстан аумағынан шығуға тыйым салынған. Сонымен қатар бұл тыйым ел аумағында жүріп-тұруға қолданылмайды. Сотталған адамның ел аумағында болуы оған қатысты белгіленген шектеулерге қайшы келмейді. Сот жүктеген міндеттердің орындалуын қадағалау мәселесі пробация қызметінің құзыретіне жатады", – деп хабарлады комитет.

Ведомство өкілдері Жанәбілов пробация қызметінің мамандарымен тұрақты түрде байланыста екенін және сот жүктеген міндеттерді орындап жатқанын айтты.

Мән-жайы

Еске сала кетейік, 27 сәуірде Астана соты блогерлер Жанәбілов пен Төлегеноваға қатысты үкім шығарған болатын. Олар заңсыз кәсіпкерлікпен айналысқаны және қылмыстық жолмен алынған ақшаны заңдастырғаны үшін кінәлі деп танылды.

Сот үкімі бойынша:

Эльмира Төлегеноваға – мүлкі тәркіленіп, қауіпсіздігі барынша төмен мекемеде 2 жылға бас бостандығынан айыру жазасы кесілді. Жазаны өтеу мерзімі 2 жылға шегерілді; Ерболат Жанәбіловке – мүлкі тәркіленіп, 2 жылға шартты түрде бас бостандығынан айыру жазасы тағайындалды.

Бастапқыда прокурор қатаңырақ мерзім сұрағанымен, соңында айыптаушы тарап жеңілдетілген нұсқаға келіскені атап өтілді.

Үкімнен кейін блогерлерге не істеуге рұқсат етілген?

Заң тұрғысынан Ерболат Жанәбіловке блог жүргізуге тыйым салынбаған. Бұған дейін заңгер түсіндіргендей, блогерлік қызмет жалғасуы мүмкін, бірақ шартты мерзімге байланысты бірқатар шектеу бар.

Ол келесі істерді атқара алады:

блог жүргізу және контент жариялау; жарнама берушілермен жұмыс істеу; жұмыс істеу және оқу.

Бірақ мынадай шектеулерді сақтауға міндетті:

сағат 22:00-ден 06:00-ге дейін үйінде болу; жұмысқа қатысы жоқ көңіл көтеру орындарына бармау; тұрғылықты жері немесе жұмыс орны ауысқан жағдайда хабардар ету; шетелге шығу мүмкіндігі шектелген.

Пробациялық бақылау 2 жылға созылады, ал тәртіп бұзылған жағдайда шартты мерзім нақты бас бостандығынан айыру жазасына ауыстырылуы мүмкін.

Эльмира Төлегенованың жағдайы

Эльмира Төлегенова үшін басқа құқықтық режим белгіленген - жас балаларының болуына байланысты жазаның орындалуы 2 жылға шегерілді.

Ол үшін анағұрлым жеңіл шарттар қолданылады:

жүріп-тұру уақыты бойынша шектеу жоқ; блог жүргізуге және жұмыс істеуге болады; кез келген жерге баруға рұқсат етілген.

Алайда, қоғамдық тәртіп бұзылған немесе ата-аналық міндеттер тиісінше орындалмаған жағдайда шегерудің күші жойылуы мүмкін. Мұндай жағдайда 2 жылға бас бостандығынан айыру жазасы орындалуы мүмкін.

Тағы оқыңыз: Блогер Жанәбіловтер үкімнен кейін алғашқы жазбасын жариялады

Google News арқылы жаңалықтарымызды қадағалаңыз

Жазылу