Қытайда люкс кроссовер өртенді дилерлік орталық не деп жауап берді

Қытайдың Ханчжоу қаласында Lynk & Co 08 кроссовері өртенді. Компания мәліметінше, өртке көліктің жоғары вольтты батареясы емес, машинаның астында қалған пауэрбанк себеп болуы мүмкін, - деп хабарлайды Tengri Auto тілшісі CarNewsChina басылымына сілтеме жасап.

Оқиға 9 қыркүйекте шамамен сағат 16:06-да қаланың сауда көшелерінің бірінде болған. Куәгерлер түсірген видеодан тұрақта тұрған көліктің астынан түтін шығып, кейін от тұтанғанын көруге болады.

Фото: CarNewsChina.com. Куәгерлер Lynk & Co электромобиліндегі өртті сөндіріп жатыр

Жүргіншілер отты өрт сөндіргіш көмегімен сөндіруге тырысқан. Кейінірек оқиға орнына өртсөндірушілер келеді.

Жарияланған кадрлардан өрттің нақты неден шыққаны көрінбейді. Сондай-ақ видеодан көліктің батареясы зақымдалғанын немесе өртенгенін анықтау мүмкін емес.

Келесі күні Lynk & Co жергілікті дилері мәлімдеме жасады. Оның нұсқасы бойынша, өрт алдында жүргіншілердің бірі пауэрбанкті түсіріп алған, содан кейін ол көліктің астына қарай жылжыған көрінеді.

Дилер кроссовердің жоғары вольтты батареясы өртенбегенін алға тартып отыр. Дегенмен, өрттің түпкілікті себебі әлі анықталуы керек. Компания өртке қарсы қызметтің ресми қорытындысын күтетінін мәлімдеді.

Осылайша, пауэрбанк туралы нұсқа әзірге тек көлік иесі мен дилер айтқан түсініктеме күйінде қалып отыр. Өрттің шығу көзін дәл анықтайтын ресми тексеру нәтижелері әлі жарияланған жоқ.

ЧИТАЙТЕ ТАКЖЕ

Түркияда Mercedes электромобилі өртеніп, 12 сағат бойы сөндірілді

Қытайда қуаттау станциясы жанында Zeekr 7X өртенді: компания тексеру жүргізіп жатыр

Бізді Google-дың негізгі дереккөздер тізіміне қосыңыз