Алматының танымал муралдары жаңа қасбеттермен жабылып жатыр: әкімдік не деп жауап берді

Алматыда 2016-2019 жылдары өткен көше өнері фестивальдері кезінде пайда болған танымал муралдар жабыла бастады. Tengrinews.kz бұл шешімнің себебін анықтап көрді.

"Бұл муралды жаппақшы ма?": алматылықтар не дейді?

Қазанның басында әлеуметтік желілерде бірнеше танымал туынды жойылып кетуі мүмкін екені туралы жазбалар пайда болды.

Олардың қатарында "310" тобының "Алма атасы", беларусь суретшісі Александр Благойдың "Петроглифтері бар қыз", қазақстандық Repas workshop шеберханасының "Ғарышкермен бірге жұлдызды түн", украин суретшісі Андрей Пальвальдың "Балалар әлемді салады" және ұлыбританиялық суретші Fanakapan-ның "QZ" еңбектері аталды.

Threads желісіндегі жазбалар скриншоты

Бұл туындылардың барлығы Алматыда 2016-2019 жылдар аралығында пайда болған. Осы уақыт ішінде олар қаланың үйреншікті келбетінің ажырамас бөлігіне айналды.

Муралдардың орнында құрылыс сатысы: біз не көрдік?

Tengrinews.kz тілшісі 7 қазанда Құрманғазы көшесімен жүріп өтіп, төрт танымал муралдың жай-күйін көрді: "Алма атасы", "Петроглифтері бар қыз", "Балалар әлемді салады" және "QZ".

Алматыдағы Құрманғазы көшесіндегі "Алма атасы" муралы / Фото Tengrinews.kz / Ақбота Сіләм

Алматыдағы Құрманғазы көшесіндегі "Петроглифтері бар қыз" муралы / Фото Tengrinews.kz / Ақбота Сіләм

Сол кезде төрт ғимаратта да құрылыс сатылары орнатылған болатын.

Алматыдағы Құрманғазы көшесіндегі "Балалар әлемді салады" муралы / Фото Tengrinews.kz / Ақбота Сіләм

Алматыдағы Құрманғазы көшесіндегі "QZ" муралы бар көпқабатты үй / Фото Tengrinews.kz / Ақбота Сіләм

Әкімдік муралдарды неге жапты?

Медеу ауданы әкімінің аппараты Tengrinews.kz-ке қазір ауданда ғимараттардың қасбеті жаңартылып жатқанын хабарлады. Жұмысшылар тозған элементтерді қалпына келтіріп, конструкцияларды реттеп, үйлердің сырт келбетін өзгертіп жатыр.

"Бұл жұмыстарды іске асыру барысында жекелеген ғимараттардағы муралдарды жаңа қасбеттік конструкциялармен жабу қарастырылған", – деп хабарлады әкімдік.

Фото Tengrinews.kz / Ақбота Сіләм

"Алма атасы" қалады, бірақ жаңа қасбеттің астында

Әкімдік өкілдері барлық мурал жойылмайтынын атап өтті. Шенеуніктердің сөзінше, жұмысшылар "310" тобының "Алма атасы" муралын боямайды.

"Суреттерді жабу барлық жағдайда олардың жойылатынын білдірмейді. Атап айтқанда, Назарбаев даңғылында орналасқан "310" тобының муралы боялмайды немесе бұзылмайды. Көркем бейнесі бар беткі қабат жаңа қасбеттік шешімнің астында болады. Осылайша, туынды сақталады", – деп хабарлады аудан әкімдігі.

Фото Tengrinews.kz / Ақбота Сіләм

Ескі муралдардың орнына жаңасы салынбайды

Сондай-ақ біз әкімдіктен жаңартылған қасбеттерде жаңа суреттер пайда бола ма деп сұрадық.

"Қасбеттерді жаңарту бойынша жүргізіліп жатқан жұмыстар аясында жаңа муралдар салу қарастырылмаған", – деп жауап берді әкімдік.

Фото Tengrinews.kz / Ақбота Сіләм

Билік муралдардың орнына QR-кодтары бар тақтайшалар орнатуды жоспарлап отыр. Олар арқылы қала тұрғындары туындылардың қандай болғанын көріп, олардың тарихы мен авторларының есімдерін біле алады.

Суретшілерге жөндеу туралы ескертілді ме?

Әкімдік суретшілерге муралдарды жабу жоспары туралы алдын ала ескертілгенін айтты. Бұл ретте шенеуніктер авторлар мұндай шешіммен келісті ме, жоқ па нақтыламады.

Фото Tengrinews.kz / Ақбота Сіләм

Сондай-ақ муралдары жөндеу жұмыстарына іліккен авторларға Алматыда жаңа туындылар жасау ұсынылғаны хабарланды.

Әкімдік мәліметінше, жаңа суреттер Есентай өзені жағалауында пайда болды.

Бұл ретте әкімдік қанша муралды жабу немесе бояп тастау жоспарланғанын нақты айтпады. Ведомство оларды есепке алу, жойылу, қаржыландыру және авторлық құқық мәселелері басқа ведомстволар мен құқық иеленушілердің құзыретіне жататынын түсіндірді.

Бұл муралдар осыдан он жылға бұрын пайда болған

Еске салсақ, муралдардың көпшілігі Алматыда 2016-2019 жылдардағы көше өнері фестивальдері кезінде салынған. Оған Қазақстан, Беларусь, Украина, Ұлыбритания және басқа да елдердің суретшілері қатысты.

Сол кезде авторлар тұрғын үйлердің қасбеттерінде ауқымды суреттер салған еді.

Бізді Google-дың негізгі дереккөздер тізіміне қосыңыз

Қосу