СҚО да баласын мектеп формасымен қамтамасыз етпеген екі ата анаға әкімшілік іс қозғалды

Ведомство басшысы Гүлнар Таласбаеваның айтуынша, биыл жалпы сомасы 1,5 млн теңгенің айыппұлы салынған. Мәселен, балалары сабақты себепсіз қалдырғаны үшін 11 ата-ана айыппұл төледі. Әкімшілік жазаға тартылғандардың ішінде М.Жұмабаев ауданының тұрғындары да бар. Мұндағы екі ата-ана балаларына міндетті мектеп формасын кигізбеген. Бұл жолы ескерту алды, қайталанған жағдайда айыппұл арқаламақ. Ал былтыр 5 ата-ана формаға қатысты жазаланды. 

- Квалификациялық талаптарды орындамағандарға да айыппұл салынды. Біздің ұлттық деректер базамыз бар. Ол толтырылуы керек, оған жауапты мектеп директоры. Ішінара мониторинг жасағанда кей мәліметтер сәйкес келмей жатады. Мысалы, мұғалімнің санаты базаға дұрыс енгізілмеуі мүмкін. 

Сондай-ақ жоспардан тыс тексерістер жүргіземіз. Биыл осындай үш тексеріс болды. Екі жекеменшік балабақшаға қатысты шағым түсті. Ата-аналармен жасалған келісімшарт орындалмаған. Сондай-ақ бір колледж бен жекеменшік бастауыш мектепке де айыппұл салынды, - дейді Гүлнар Таласбаева. 

Бұдан бөлек департаментке биыл 70-тен аса өтініш-шағым түскен. 

Департамент басшысының айтуынша, көбіне ата-аналар баласын мұғалім ренжітіп жатыр, бағаны әділетті қоймайды деп хабарласады екен. 

- Педагог әдепті сақтамайды немесе директор мұғалімді ренжітеді деген сияқты шағымдар да болады. Мысал келтіретін болсақ, биыл дене шынықтыру пәнінің мұғалімі сағат санын дұрыс бермейді деп, директорына шағымданды. Бастауыш сыныпта бұл пәнді бір ставка - 16 сағатқа жеткізу үшін мұғалімдердің өздері береді екен. Олардың дипломдарында бұл пәнді оқығандығы көрсетілген, яғни құқығы бар. Осындай қарама-қайшы мәселелер болады. Оның бәрін тексеріп, заң жүзінде шешім қабылдаймыз. 

Шағым-өтініштер азаматтардан eOtinish-пен де түседі, қағазбен де әкеледі, поштамен де келеді. Біздің құзыретімізде болса, жауап береміз немесе тиісті мекемеге жолданады. 

Прокуратура арқылы жоспардан тыс тексеріс жүргіземіз. Ол үшін де бізге негіз керек. Шағымданушы қосымша ақпарат, құжаттар, бейнежазбалар берсе – оны міндетті түрде дәлел ретінде қолданамыз, тексеріс бастаймыз, - дейді Гүлнар Таласбаева. 

Бұған дейін шекара маңындағы мектептер мен медицина нысандарына қойылатын нормативтер өзгеруі мүмкін екенін жазған едік.