Ақмола облысында жол қауіпсіздігін қамтамасыз етпеген лауазымды тұлғалар жазаланды

Ақмола облысында жол қауіпсіздігін тиісті деңгейде қамтамасыз етпегені үшін 14 лауазымды тұлға әкімшілік жауапкершілікке тартылды.

Жыл басталмай жатып, жаза арқалағандардың арасында бөлім басшылары, жол мекемелерінің мамандары мен ауыл әкімдері бар. Қатаң шарадан кейін бе қазір өңірдегі ірі тас жолдарда қар тазалау жұмысы қарқын алды. 340 техника мен 800-ге жуық адам жұмылдырылды. 

Ысқақ Баймұқанов коммуналдық мекемеде 35 жылға жуық жұмыс істейді. Қысы-жазы жолдың тазалығына жауапты. Әсіресе қыста жұмыстың қиындығы көп, дейді. Күнделікті техникасын дайындап, қар тазалауға шығады. 

Ысқақ Баймұқанов, жол тазалайтын мекеменің жүргізушісі:

- Негізі біздің жұмыс кестеміз сағат таңғы 8-ден кешкі 5-ке дейін. Бірақ қысқы уақытта тәулік бойы жұмыс істейтін кездеміз боламыз. Жолдарға құм төсеп, қардан тазартамыз. Техникамыз жаңа. Жұмыс істеуге өте ыңғайлы.

Облыс аумағында 2 мың шақырымнан астам республикалық және 5 жарым мың шақырымға жуық облыстық маңыздағы тасжол бар. Коммуналдық мекемелер негізгі күшті көлік ағыны көп күре жолдарға салады.  Ал жергілікті жолдар көбінде назардан тыс қалады. Сала мамандары биыл мұндай олқылық болмайды деп отыр. 

Ахат Зайкүл, "ҚазавтожоЛ" ҰК" АҚ филиалының бас маманы:

- Қазір бізде 51 мың тоннадан астам құм, 1600 тонна тұз және мың тоннаға жуық химиялық реагенттер дайындалды. Инертті материалдарды ауа райына байланысты қолданамыз.

Абзал Азаматұлы, тілші:

- Қарлы боран, көктайғақ, қалың қар. Мұның бәрі аязды Ақмола облысында жиі кездесетін құбылыс. Соның салдарын аймақта жолдар жиі жабылып, жол-көлік оқиғалары көп тіркеледі. Мәселен, жыл басынан бері өңірде 10 жол апаты болған. 

Осы ретте жүргізушілерге де жауапкершілік жүктеледі. Өйткені дауылды күндері жолға шығып, ескертуді елемейтіндер көп. Тәртіп сақшылары қауіпсіздік шараларын күшейтті. Республикалық жолдарда жылдамдықты анықтайтын бейнебақылау құрылғысын көбейтті.

Евгений Ермишин, көлік жүргізуші:

- Жылдықты қадағалайтын камераларды көбейткені дұрыс болды. Әйтпесе, қазір көп жүргізушілер жылдамдықты қадағалай бермейді. Әсіресе боранды күндері қауіп төндіретіндер көп.

 Сансызбай Көпжасаров, көлік жүргізуші:

- Щучьеден келе жатырмын. Былай қарасан жолды тазалап тұрады. Онша көп жүрмеймін. Анда-санда ғана жүремін. Жол таза. 

Полицейлер жолдағы қауіпсіздікті қамтамасыз етіп қана қоймай, тазалығын да назарда ұстайды. Жол тазалайтын техникаларды тексеріп, жұмысына салғырт қарағандарды жауапкершілікке тартады.  

Ержан Қошқарбаев, облыстық ПД басқармасының бастығы:

- Жыл басынан бері көктайғақ кезінде құм төсемеген және жолды қардан тазартпаған 14 лауазымды тұлға жауапкершілікке тартылды. Ал былтыр 3 мыңға жуық тексеру жүргізіп, жұмысына салғырт қараған 300-ден астам адамды жазалады. Бұл жұмыстар әлі де жалғасады.

Жауаптылар қыстыгүні жолда абай болу керектігін ескертеді. Әсіресе смс-хабарламаларды назардан тыс қалдырмаған жөн. Алдын алу шаралары жасалғанымен табиғаттың тосын мінезіне төтеп беру оңай емес, дейді тәртіп сақшылары. 

Абзал Азаматұлы, Виктор Полянный