СҚО да жүргізуші мен жолаушы өртеніп кетті

7 ақпанда Қызылжар ауданындағы Карлуга ауылының маңында адам өліміне әкеп соққан жол-көлік оқиғасы болды. Соқтығысудан кейін жеңіл көлік пен жүк көлігі өртеніп кеткен, деп хабарлайды Arasha.kz.

Апат сағат 15:10 шамасында «Жезқазған–Арқалық–Петропавл» тас жолының 927-шақырымында болған. Алдын ала мәліметтер бойынша, Toyota Camry автокөлігінің 55 жастағы жүргізушісі Петропавлдан Явленка ауылына қарай бет алған, деп жазды Halyqstan телеграм арнасы.

Бір сәтте ол қарсы бағытқа шығып кетіп, 37 жастағы ер адам басқарған Shacman жүк көлігімен соқтығысқан.

Өрт жеңіл көлікті және жүк көлігінің кабинасын шарпыды. Toyota Camry жүргізушісі мен оның жолаушысы оқиға орнында қаза тапты. Олардың күйіп кеткен денелері апат орнынан табылды.

Жүк көлігінің жүргізушісі ауруханаға жатудан бас тартты. Оған «кеуде тұсының соғылуы» деген диагноз қойылды.

«Shacman жүк көлігі мен Toyota Camry жеңіл автокөлігінің қатысуымен болған, соның салдарынан Toyota жүргізушісі мен жолаушысы қаза тапқан жол-көлік оқиғасы дерегі бойынша полиция қылмыстық іс қозғады», — деп хабарлады Полиция департаментінен.

Қазіргі уақытта қайғылы оқиғаның себептері мен мән-жайы анықталып жатыр.