Стэнфорд түлектері Google басшысының сөзін тыңдамай залдан шығып кетті

BBC News жариялаған материалға сүйенген Aikyn.kz Google-дің басышысына Стэнфорд студенттері неге наразылық білдіргенін талдайды.

BBC News жариялаған видеода студенттердің Google компаниясының АҚШ үкіметімен және Израильмен байланысына қарсылық білдіргені көрінеді. Наразылықты «Палестинадағы әділеттілік үшін Стэнфорд студенттері» қозғалысы ұйымдастырған. Кейбір студенттердің қолында «Google жасанды интеллект арқылы ICE тыңшылық жүргізеді» деген жазулар болды. Басқалары Палестина туларын көтеріп шыққан. Жергілікті SFGate басылымының мәліметінше, наразылық акциясына шамамен 200 студент қатысқан.

Бұл оқиға соңғы уақытта АҚШ университеттеріндегі жаңа тенденцияның бір бөлігіне айналды. Бұрын студенттер саясаткерлерге немесе соғысқа қарсы наразылық білдірсе, бүгінде технологиялық корпорациялар мен жасанды интеллект мәселесі алдыңғы қатарға шығып отыр.

Сундар Пичаи жасанды интеллект тақырыбын көп қозғамай, студенттердің көңіл-күйіне байланысты өз сөзін әзілмен бастады.

«Көп адамға мен үшін бұл оңай болмайды деп ойлаған шығар. Өйткені менің фамилиямның соңғы екі әрпі – AI», – деді ол.

Алайда бұл әзіл аудитория қарсылығын сейілте алмады. Соңғы айларда АҚШ университеттерінде технологиялық компания басшыларының сөздері жиі сынға ұшырап жүр. Мысалы, Google-дың бұрынғы басшысы Эрик Шмидт Аризона университетіндегі сөзінде жасанды интеллектің болашағы туралы айтқанда студенттердің ысқырығына тап болған.

Ұқсас жағдай Флоридадағы Орталық университетте және Теннесси штатындағы университеттердің бірінде де қайталанған. Студенттер жасанды интеллект еңбек нарығына қауіп төндіреді деп есептейді.Бұл алаңдаушылықтың негізі бар. Сарапшылардың бір бөлігі жасанды интеллект көптеген мамандықтарды автоматтандырып, жастар үшін жұмыс табуды қиындататынын айтады. Әсіресе бағдарламалау, әкімшілік қызметтер, маркетинг және контент өндірісі салаларында өзгерістер күшейіп келеді. Наразылық тек жұмыс орындары мәселесімен шектелмейді. Студенттердің бір бөлігі технологиялық алыптардың мемлекеттік құрылымдармен және әскери жобалармен әріптестігіне де күмәнмен қарайды.

Стэнфордтағы оқиға қазіргі қоғамдағы маңызды өзгерісті көрсетті. Бұрын технологиялық компаниялардың жетекшілері жастар үшін шабыт көзі саналса, бүгінгі студенттер олардың қызметінің әлеуметтік, саяси және этикалық салдарын да талқылай бастады.

Жасанды интеллект дәуірі тек технологиялық емес, қоғамдық және этикалық-моральдық мәселелерді де алдыңғы қатарға шығарып отыр. Сондықтан технологиялық компаниялар жаңа өнімдер ғана емес, қоғамның сенімі үшін де күресуге мәжбүр болуда.