Сүйінші, ағайын! Қазақстан барысы атанған балуан жайлы қуанышты хабар тарады

Абай облысының Аягөз ауданы әкімінің орынбасары қызметіне әйгілі балуан, «Қазақстан барысы» турнирінің екі дүркін жеңімпазы Айбек Серікболұлы Нұғымаров тағайындалды, деп Arasha.kz тілшісі Sportinside.kz сайтына сілтеме жасап хабарлайды.

Айбек Нұғымаров 1987 жылдың 3 маусымында Абай облысына қарасты Құндызды ауылында дүниеге келген. Ол Семей политехникалық колледжін «Заңгер», Семей мемлекеттік педагогикалық институтын «Дене шынықтыру», ал Қазақ инновациялық гуманитарлық-заң университетін «Құқықтану» мамандығы бойынша тәмамдаған. Кейін Л.Н. Гумилев атындағы Еуразия ұлттық университетінде құқықтану магистрі дәрежесін қорғаған.

Еңбек жолын 2010 жылы ШҚО Олимпиадалық резервтегі №1 балалар мен жасөспірімдер спорт мектебінде жаттықтырушы-оқытушы ретінде бастаған. 2013–2019 жылдар аралығында Шығыс Қазақстан облысының дене шынықтыру және спорт басқармасына қарасты жоғары спорт шеберлігі мектебінде аға нұсқаушы-әдіскер қызметін атқарған. Ал 2019 жылдан бері Семей қаласындағы Көлік колледжінің директоры лауазымында болған.

Айбек Нұғымаров – Қазақ күресінен Қазақстанның еңбек сіңірген спорт шебері, сондай-ақ дзюдо және самбо бойынша спорт шебері. Ол – он дүркін Қазақстан чемпионы, төрт дүркін Азия чемпионы, «Әлем Кубогының» үш дүркін иегері, Қазақ күресінен әлемнің төрт дүркін чемпионы, «Еуразия Барысы» халықаралық турнирінің төрт дүркін, және «Әлем Барысы» турнирінің үш дүркін жеңімпазы.

Сонымен қатар, Айбек Нұғымаров – «AMANAT» партиясының Саяси кеңесі мен республикалық саяси кеңестің мүшесі, VII және VIII шақырылымдағы Абай облыстық мәслихат депутаты болған. Ол ел спортының дамуына сіңірген еңбегі үшін бірқатар мемлекеттік марапаттар мен жоғары дәрежелі наградаларға ие.