Табиғатпен тілдескен орманшылар

Ақмола облысында 1 млн-нан астам гектар орман алқабы бар. Қазір табиғаттың баға жетпес байлығын 1 мыңнан астам орманшы қорғап жүр.

Олар тек жасыл желекті емес, жануарлар мен құстарды да қамқорлығына алған. Қазан айының үшінші жексенбісі дәл осы мәртебелі мамандық иелерінің төл мерекесі.

Саналы ғұмырын тау-тасты кезіп, табиғатты қорғауға арнаған жанның бірі – Көшпай Бұқанов. Орманшылар әулетінен шыққан ол осы салаға 44 жыл бойғы ғұмырын арнаған. Еңбек жолын ұлттық табиғи парктің Зеренді филиалында қарапайым жұмысшы болып бастап, директор лауазымына дейін көтерілді.

Көшпай Бұқанов, «Көкшетау» МҰТП Зеренді филиалының директоры:

- Мен бала кезімнен әкемнің қасында жүріп, табиғатқа жақын болдым. Осы салаға келуіме сол кісі себеп болды. Әкем санаға ормандағы әр тал біздің байлығымыз екенін, оны қызғыштай қорғау керектігін түсіндірді. Міне, қазір сол жұмысты абыроймен атқарып жүрмін деген ойдамын.

Жалпы орманшылардың жұмысы қауырт. Жазда өртпен алысса, қыста дала жануарларын қоректендіріп, браконьерлерден қорғайды. Ал жаңа жыл қарсаңында шыршалардың қауіпсіздігіне жауапты.

Бақтияр Олжағұлов, «Көкшетау» МҰТП Зеренді филиалының бөлім бастығы:

- Көшпай Бұқанов басшы ретінде өте талапшыл. Өз ісіне асқан жауапкершілікпен қарайды. Осы алқаптағы әр ағашқа өз баласындай қарайды. Ол кісіден үлгі аламыз. Өзінің  біліктілігі арқасында осындай дәрежеге жетті.

Соңғы жылдары орманшыларға мемлекеттен көп көңіл бөлініп отыр. Шаруашылықтарға жаңа техникалар беріліп, сала мамандарының жалақысы өсті.

Көшпай Бұқанов, «Көкшетау» МҰТП Зеренді филиалының директоры:

- Кезінде жұмысқа қабылданғанда мұндай жағдай болмады. Орман алқаптарын жаяу немесе  атқа мініп бақылайтынбыз. Қазір техникалық база жыл сайын жаңарып тұрады. Жалақымызда көтерілді. Бұл орманшыларға үлкен қолдау.

Айта кету керек, биыл өңірде 18 млн түп ағаш егілді. Осылайша 2 мың гектардан астам алқап жасыл желекке айналды. Бұл көшеттерді әрі қарай жайқалтып, ну орманға айналдыруда орманшылардың аянбай тер төгетіні сөзсіз.

Авторлары: Абзал Азаматұлы, Виктор Полянный