Табиғатпен үндескен өлке

Жалпыұлттық «Таза Қазақстан» экологиялық акциясы өңірдің келбетін жыл санап жаңартып келеді. Биыл облыс аумағында 12 жасыл аймақты – 9 саябақ, 1 гүлзар, 2 аллеяны абаттандыру жоспарланған. Бұл – экологиялық ахуалды жақсартатын, қалалар мен ауылдардың ажарын ашатын ауқымды жұмыс.

Суретті түсірген – Жеңіс ЫСҚАБАЙ

Жаңаша кейіпке ене­тін бұл орындар серуендейтін аумақ қана емес, тұрғындардың күнделікті өмірімен біте ­­қайнасатын қоғамдық кеңіс­тікке айналмақшы. Мұн­да жаяу жүргіншілер жолы, демалыс орындықтары, жарық­тандыру жүйелері орнатылып, көгалдандыру жұмысы жүргізіледі. Балаларға арналған ойын бұрышы мен ересектерге арналған тынығу алаңы жасақталып, әр нысанның табиғи ерекшелігі сақталады.

Экоакция аясындағы жұ­мыс­тың ауқымы мұнымен шектелмейді. Биыл өңірде 25 аула абаттандырылып, тұр­ғындарға қолайлы орта қалып­тастырылады. Сонымен бірге 17 балалар және спорт алаңы салынып, саламатты өмір салтын насихаттауға басымдық беріледі. Бұл – әсіресе жас ұрпақтың бос уақытын тиімді өткізуіне, аула мәдениетінің жақсаруына үлкен мүмкіндік.

Тұрғын үй-коммуналдық инфрақұрылым да назардан тыс қалған жоқ. 148 көпқабатты тұрғын үйдің шатырлары мен қасбеттері жөнделіп, олардың сыртқы келбеті жаңарды. Бұл тек эстетикалық өзгеріс емес, үйлердің техникалық жағдайын жетілдіріп, тұрғындардың қа­уіп­сіздігі мен жайлылығын арттыруға бағытталған маңызды шара. Сонымен қатар 15,6 км арық желісі тазартылып, қал­пына келтіріледі. Жұмыс көктемгі еріген қар суын тиімді бұруға, су тасқыны қаупін азай­туға сеп болады.

Көшелердің жарық­тан­дырылуы да айрықша мәнге ие. Жоспарға сәйкес, 200 қараңғы көшеге жарық орнатылады. Бұл түнгі уақытта қауіпсіздікті күшейтіп қана қоймай, елді мекендердің эсте­тикалық кел­бетін де айқындай түседі. Көгал­дан­дыру бағытында 121 мың көшет егу көзделген. Жас ағаштар уақыт өте келе көлеңкелі аллеялар мен жасыл белдеулерге айналып, өңірдің экологиялық тепе-теңдігін сақтауға үлес қосады.

Өткен жылдың нәтижесі де бұл бастаманың жүйелі түрде жүзеге асып жатқанын көрсетеді. Былтыр облыс көле­мінде 13 саябақ, 6 аллея, 2 гүлзар жаңартылып, тұрғын­дар­дың игілігіне берілді. Сол нысандардың ішіндегі айрықша жобалардың бірі – Сарқан ауданындағы табиғи ландшафты сақтай отырып салынған сая­бақ. Аумағы 6 гектарды құрай­­тын орын табиғат пен сәулет­тің үйлесімін айқын танытады. Мұнда Жоңғар – Алатау ұлттық табиғи паркінің флорасы мен фаунасын бейнелейтін ағаштар отырғызылып, жануарлар мүсіндері орнатылған. Саябақ алдағы уақытта экопарк ретінде дамытылып, экологиялық туризмнің жаңа ны­санына айналмақшы. Яғни тек демалыс орны емес, та­биғатты тануға, қоршаған ор­таға жауапкершілікпен қа­рауға үндейтін ашық аспан астындағы экологиялық білім алаңы бол­мақшы.

«Таза Қазақ­стан» бағдар­ла­ма­сы аясында өңірде 2 орталық алаң, 49 аула, 81 балалар мен спорт алаңы абаттандырылды. 77 көп­қабатты тұрғын үйдің шатыры мен 33 қасбеті жөнделді. 16,5 км арық желісі мен 72 ескерткіш қалпына келтірілді. Бұдан бө­лек, 315 шақырым жерге көше жарығы орнатылып, Сарқан, Үштөбе қалаларында, сондай-ақ Көксу ауданының Балпық би ауылында көпқабатты үйлердің қабырғаларына үш тақырыптық мұрал салынды.

– «Таза Қазақстан» мұралы экологиялық мәдениет пен қоршаған ортаға ұқыпты қарау тақырыбына арналған. «Адал азамат» мұралы адалдықты, патриотизмді, жауапкершілікті білдіреді. «Заң мен тәртіп» мұралы әділетті мемлекет құру­дағы заң үстемдігі мен қоғамдық тәртіптің маңызын көрсетеді. Біз, жастар, тазалықты сақтау, адал еңбек ету, заң мен адамдарды құрметтеу – болашаққа қосқан үлесіміз деп санаймыз, – дейді «Жетісу жастары» КММ директоры Шамиль Ванкеев.

Облыс әкімі баспасөз қыз­метінің мәліметінше, былтыр өңірде қоршаған ортаны қорғау және экологиялық мәдениетті қалыптастыру бағытындағы іс-шараларға 227 мың тұрғын қатысты. Нәтижесінде, 134,9 мың көшет отырғызылып, 16 мың тонна қоқыс шығарылды.

Жалпы алғанда, Жетісуда жүзеге асып жатқан шаралар өңірдің экологиялық келбетін жақсартып қана қоймай, тұр­ғындардың өмір сапасын арт­тыруға бағытталған. Жасыл желекке оранған көшелер, сәу­летті саябақтар, таза аулалар – мұның бәрі табиғат пен адам арасындағы үйлесімнің нығая түскенін анық аңғартады.

Жетісу облысы 

Соңғы жаңалықтар

Бағзыдан жеткен балбал тас

Жәдігер • Бүгін, 09:00

Тарихи ескерткіштер қорғауға зәру

Мәселе • Бүгін, 08:58

Шашубайдың тамы

Әдебиет • Бүгін, 08:55

Халық мұғалімі

Зерде • Бүгін, 08:52

Парасат биігіндегі ғұмыр

Тұлға • Бүгін, 08:50

«Айқаптағы» Мағжан өлеңдері

Әдебиет • Бүгін, 08:48

Сөз сайысындағы сатира

Мирас • Бүгін, 08:45

Қылқаламдағы қала тынысы

Көрме • Бүгін, 08:43

Құқықтық сауатты арттыратын алаң

Заң мен Тәртіп • Бүгін, 08:40

Сана тазармай, дала тазармайды

Қоғам • Бүгін, 08:38

Қажымұқан туралы тұңғыш драма

Театр • Бүгін, 08:35

Қамкөңіл жандарды қолдаған еріктілер

Қоғам • Бүгін, 08:33

Нейрохирургия: бүгіні мен болашағы

Медицина • Бүгін, 08:30

Тайм-менеджмент және талапты студент

Жастар • Бүгін, 08:27

Үш айда 32 адам қаза тапты

Қоғам • Бүгін, 08:25

Барлық жаңалықтар