Таиландтан Мьянмаға 700 теңгеге қалай қарауға болады

Таиландтың қиыр солтүстігінде бір бақылау алаңынан бірден екі елді көруге болатын орын бар. Бұл жер туралы "Реальный Таиланд Новости" Telegram-арнасында айтылды, - деп хабарлайды Tengri Travel.

Бұл жер Чианграй провинциясындағы Мэ Сай елді мекенінде, Мьянмамен шекараға таяу тұста орналасқан.

Ұзындығы шамамен 150 метр болатын Sky Walk Phra That Doi Wao иілген шыны жолы беткей бойымен созылып жатыр: оның бір жағынан Таиландтың Мэ Сай қаласына, екінші жағынан Мьянмадағы Тачилек қаласына көрініс ашылады.

"Биіктен екі елдің бір-біріне қаншалық жақын екені анық көрінеді: Мэ Сай мен Тачилек әкімшілік жағынан мемлекеттік шекарамен және Сай өзенімен бөлінген екі түрлі қала болғанымен, іс жүзінде біртұтас қалалық массивке айналған", - делінген жарияланымда.

Sky Walk 2023 жылғы 9 қарашада ашылды. Бұл – Таиландтың ең солтүстігінде орналасқан шыны бақылау алаңы. Ересектер үшін кіру құны 50 бат (шамамен 700 теңге), ол сағат 07:00-ден 20:00-ге дейін жұмыс істейді.

Сонымен қатар, мұнда Мэ Сайдың ең көне ғибадатханаларының бірі – Wat Phra That Doi Wao-ға баруға болады.

"Жергілікті аңыз бойынша, қасиетті орынның тарихы 2000 жылдан асады және ол осында Будда жәдігерін сақтау үшін ступа тұрғызған Вао есімді билеушімен байланысты. Ескі ступа уақыт өте келе қирап, қазіргі нұсқасы XX ғасырда қалпына келтірілді. Ғибадатхананың өзіндік ерекше нышаны бар – ол алып сарышаян. Солтүстік диалектіде wao сөзі "сарышаян" дегенді білдіреді, ал мүсін осы қасиетті орынның негізін қалаған билеуші Ваоны еске салады", - деп хабарлайды Telegram-арна.

Бұған дейін Таиланд әуежайларында 2026 жылғы 16 қазаннан бастап тіркелген жүкті тексеру тәртібі өзгеретінін жазған болатынбыз. Қауіпсіздік қызметінің өкілдері тексеру кезінде күдікті, тыйым салынған немесе ұшу қауіпсіздігіне қатер төндіруі мүмкін заттарды анықтаса, чемоданды иесінің қатысуынсыз аша алады.

Google News арқылы жаңалықтарымызды қадағалаңыз