Талантты оқушыны қолдаса деймін : ҰБТ дан 140 балл жинаған оқушының арманы қандай

АСТАНА, 2 сәуір – Sputnik. Атырау облыстық дарынды балаларға арналған ұлттық гимназияның 11-сынып оқушысы Жазира Кеңесова Ұлттық біріңғай тестілеуден ең жоғарғы көрсеткіш 140 балл жинады. Жазираның болашақ арманы қандай екенін Sputnik Қазақстан тілшісі зерек оқушының өзінен сұрап білді.

Жазира ұлттық гимназияға 7-сыныпта қабылданған. Оның білім көкжиегін жетілдірген, шығармашылық қабілетін ашып, бірнеше сайыс-байқауға қатыстырып, пікірсайыс алаңына қосқан, әрине, ұлттық гимназияның ұстаздары.

"Менің таңдау пәнім – қазақ тілі мен әдебиеті. Болашақта қазақ тілі мен әдебиетінің маманы - филолог болсам деймін. Арманым - филология саласында, ғылым жолында өзімді дамыту. Мектепте ғылыми жоба сайыстарына қатысып келемін", - дейді ол.

Білім ошағында оқу процесі кезінде оқушылардың ҰБТ-ға дайындығы күн тәртібінен түскен емес. Бірнеше рет сынақ байқауын өткізіп, қатемен жұмыс жасаған ұсаздар әр оқушының болашағына жол аша білді. Жазира да өзінің жеткен жетістігін ұстаздарының арқасы дейді.

"Білім жолында жетістікке жету үшін дайындық, табандылық керек. Қатарластарыма айтарым, уақытты босқа кетірмей, өзіңізді өзгемен салыстырмай, бар назарды тек өздеріңізге салыңыздар дер едім. Егер адам өмірінде қандай өзгеріс, қандай жағдай болып жатса да, бар ынтасымен білімге ұмтылса, жетістікке жетері хақ", - дейді Жазира.

Оқушы 140 балл жинайтынына сенбегенін, бірақ іштей қатты қалағанын алға тартты.

"Қаңтарда 138 балл жинағанда, болашақтағы тестілеуде 140 балл жинатыныма ұстаздарым да сенім артты. "Сенің қолыңнан келеді" деп шабыт беретін. Бұл жетістігім дайындықтың арқасында болды", - дейді зерек оқушы.

Жазираның айтуынша, талапты, талантты оқушы өте көп, тек қолдай білу керек.

"Білім сайысында танылып жатқан ақылды оқушылар өте көп. Тек оларды қолдау керек. Олар танымал болған сайын шабыттанады. Өз қатарластары да соны көріп талпынатын еді. Мен білімді, талантты жастарды Қазақстанға танытатын орталық, телехабарлар болса екен деймін", - дейді атыраулық оқушы.

Жазираны қазақ тілі мен әдебиетінен пәндік олимпиадаға, ғылыми жобалар байқауына дайындаған - ұстазы Эльмира Қуандықова. Жазира Ұлттық гимназиядағы "Парасат" дебат клубының президенті, белді мүшесі. Пікірсайыста да жетістікке жетіп жүрген шәкірт. Үйірме жетекшісі - Асланбек Рамазан. Бұл ұстаздар да Жазираның дамуына, қажетті дағдыларының қалыптасуына өз үлесін қосты. Бұл гимназияда Жазира сияқты талантты, талапты бала көп.

"Әр оқушының деңгейін байқап, соған сай дайындық жұмыстарын жүргіземіз. Біз Жазира шәкіртіміздің жетістігімен мақтанамыз. Басқа да шәкірттеріміздің жоғары нәтиже көрсетуіне тілекшіміз және үлкен сенім артамыз", - дейді Атырау облыстық дарынды балаларға арналған ұлттық гимназия директоры Шынаргүл Имашова.