Тапшылық Иранмен соғысқа байланысты туындаған жоқ : Трамп Киевті Ресейдің МӨЗ деріне шабуыл жасамауға шақырды

АҚШ президенті Дональд Трамп дизель отынының жаһандық тапшылығы "Таяу Шығыстағы жағдайдан емес, Ресей мен Украина арасында болып жатқан оқиғалардан туындап отыр" деп санайды. РФ мұнай өндіру болжамын кейінгі 17 жылдағы ең төменгі деңгейге дейін түсірді, деп хабарлайды Tengrinews.kz PBS News басылымына сілтеме жасап.

АҚШ президенті Дональд Трамп Украина көшбасшысы Владимир Зеленскийді Ресейдің дизельдік инфрақұрылымына соққы жасауды тоқтатуға шақырды. Ақ үй басшысы жексенбі, 13 қыркүйекте отбасына тиесілі алаңда өткен Irish Open гольф турниріне барған кезінде журналистермен тілдесті.

"Біз бұл мәселені Зеленский мырзамен талқыладық. Басқа да нысаналар көп. Ресейдегі дизель отынына соққы жасауды тоқтатуыңыз керек. Бұл бүкіл әлемге зиянын тигізеді", - деді Трамп.

Америка көшбасшысы жаһандық тапшылық "Таяу Шығыстағы жағдайдан емес, Ресей мен Украинада болып жатқан оқиғалардан туындағанын" айта кетті.

Ол бұл мәлімдемені жұма күні АҚШ-та дизель отынының бағасы рекордтық деңгейге жетіп, орташа есеппен бір галлон үшін 6 доллардан асқан соң жасады.

Украина бірнеше ай бойы Ресейдің мұнай-газ саласына алыс қашықтықтан соққы жасап келеді. Бұл ел аумағында отын жеткізуді нормалауға әкеп соқты және Мәскеуді шілде айында дизель экспортына тыйым салуға мәжбүр етті, нәтижесінде әлемдік нарықтағы онсыз да шектеулі жеткізілімдер одан әрі азайды.

Дегенмен, басылымның жазуынша, жаһандық дағдарыс Ормуз бұғазы арқылы мұнай тасымалын азайтқан Иранмен арадағы соғыс тұсында өршіп отыр.

Бұған дейін БАҚ Таяу Шығыстағы шиеленістің ушығуына байланысты әлемдік жеткізілімдердің одан әрі нашарлағанын, соның ішінде нарыққа мұнай шығарудың қиындағанын хабарлады.

Бізді Google-дың негізгі дереккөздер тізіміне қосыңыз