Тау шаңғы спортын дамытуға көмек қалай беріледі?

Тау-шаңғы курортын жабдықтауға кеткен шығынның 25 проценті облыстық қазына есебінен субсиядаланады. «Бұл – қысқы туризмді спортпен ұштасыра дамытып жатқан жергілікті демалыс базалары үшін үлкен қолдау», - дейді сарапшылар.

Шығыс Қазақстан облысында жыл он екі ай жұмыс істейтін 25 туристік кешен бар. Алайда соның төртеуі ғана шаңғы, сноуборд тебу сияқты қызмет түрлерін ұсына алады. «Алты ай қысы бар өлке үшін бұл тым аз көрсеткіш», - дейді сала өкілдері. Мемлекеттік демеу қаржы туризмнің ақсап тұрған осы тұсын түгендеуге ықпал етуге мүмкін. 

Эльмира Ахметова, тілші:

- Кенді Алтайдың жазы да, қысы да керемет. Сондықтан өлкеде жыл бойы жұмысын тоқтатпайтын демалыс базасы жетерлік. Алайда соның ішінде тау шаңғы спортымен айналысуға мүмкіндік жасай алатындары тым аз. Бар болғаны төртеу ғана. «Себеп қаржыға кеп тіреледі», - дейді сарапшылар. Бұл Өскеменнен 24 шақырым жердегі Таулы Үлбі шатқалы. Шаңғы спортын дамытуға ең ыңғайлы аймақ. 12 еңіс бар. Ақ ұлпа алты ай бойы жатады. Мұндағы туристік кешен басқарушысы Әбдікерім Мұратқановтың  айтуынша, тау шаңғы курортын жабдықтауға кететін шығын көп. Мәселен базада тек бес көтергіш қана бар. Демалыс күндері бұл жаққа жүздеген адам келеді, сол кезде ұзын сонар кезек туындайды.

Әбдікерім Мұратқанов, тау-шаңғы курортын басқарушы:

- Тау шаңғы  спорты шығыны көп сала. Бір ғана аспалы жолды салу үшін бір миллард теңге кетеді. Аспалы жол, ротрака, жұмысшылар бар. Оларды қамты, жөндеу жұмыстарына, бәріне үлкен қаражат керек.

Енді тау шаңғы курортын жабдықтауға кететін шығынның 25 проценті жергілікті қазына есебінен субсидияланады. Кәсіпкерлер тиісті құжатты өткізіп, өтінім берсе болғаны. Ары қарай арнайы комиссия саралап, шешім шығарады.

Әлімжан Дайырбаев, Туризм басқармасының бөлім басшысы:

- Бұл бағдарлама бұрыннан бар. Тек енді жергілікті әкімдік жауапкершілігіне берілді. Тау шаңғы курортының өкілдері әртүрлі  жабдықтарды сатып алғанын растайтын құжаттарын бізге өткізеді. Арнайы комиссия барлығын тексеріп, шешім қабылдайды. Негізгі талаптар әлі де реттеліп жатыр.

Қаржы аспалы жол тарту, көтергіштер мен трассаларды дайындауға қажетті техникаларды жаңартуға жұмсалады. Өйткені ең қымбатқа түсетіні де осылар. Сарапшылардың ойынша да мемлкеттік қолдау туристік нысандардың техникалық әлеуетін күшейтеді. «Дегенмен сервистік қызмет көрсету сапасын арттыру да назардан тыс қалмаса екен», - дейді олар.

Cымбат Рамазанов, Кәсіпкерлер палатасы туризм бойынша кеңес төрағасы:

- Субсидия өте жақасы, бірақ сервистік қызмет сапасы көтерілсе, бағасы қарапайым халыққа қолжетімді болса екен. Сонда ойлаймын, екі тарап та жақсы нәтижеге қол жеткізіп, туризмді дамытуға септігін тигізеді.

Облыс басшыларының  қысқы туризмді дамытуға деген құлшынысы жоғары. Мәселен болашақта Риддердегі тау  жоталарында жыл бойы жұмыс істейтін «Анатау» шаңғы кластерін құру көзделген.

Эльмира Ахметова, тілші:

- Бұл бағытта жергілікті мамандар шетелдік кәсіби компаниялармен бірлесе жұмыс істеп көрмекші. Әзірге қажетті деректер жинақталып, жобаны іске асырудағы қиындықтар мен оны шешу жолдары пысықталып жатыр.

Авторлары: Эльмира Ахметова. Дмитрий Пыхтин