Тауарларға навигациялық пломба енгізіледі

Елдегі өткізу бекеттерін цифрландыру жалғасып жатыр. Шекарадағы ұзын-сонар кезек сейіле бастады.

Мемлекеттік кірістер комитеті 30 қаңтарда CarGo-Ruqsat жүйесін Алматы облысындағы «Кеген» өткізу бекетіне 16 ақпаннан бастап, Жамбыл облысындағы «Қордай» бекетіне енгізеді. 

Өткізу бекеттері жаңғыртылып жатыр

Алдағы бес жылда елдегі 55 авто өткізу бекетінің 37-сі жаңғыртылады. Былтыр ауқымды жұмыс басталды.

Инфрақұрылымды жаңартумен қатар құзырлы министрлік кеден рәсімдерін цифрландыруға да ден қойды. Бір ғана Keden жүйесі экспресс-жүктермен жұмысты, тауарларды есепке алуды және виртуалды қоймаларды автоматтандырды. Енді жасанды интеллект негізінде тауарлар мен қызметтерді декларациялау модулі іске қосылады. Осылайша шекарадан өту үдерісі едәуір жеңілдейді. Алдын ала ақпарат алмасудың арқасында кедендік рәсім уақыты қысқарып, транзиттік тасымалды жеделдетуге мүмкіндік артты.

Мәди Такиев, ҚР Қаржы министрі:

- Кеден деген жүйені бітірдік. Бұрын біз үш жүйені бітірсек, қазір бір ғана жүйе болады. Кеден жүйесінде бәрі цифрландырылды. Бекеттердің барлығы сканер, онлайн режимде орталыққа тапсырылып жатыр. Толық көріп отырмыз бәрін.

Қорғас бекетінің әлеуеті артты

Ал Қорғас – Орталық Азия мен Қытайды байланыстыратын алтын көпірге айналды. Қытай мен Еуропаны тоғыстыратын негізгі хабтардың бірі. Былтыр шекара арқылы тауар айналымы 46 млн тоннадан асқан. Бұл рекорд. Қорғас арқылы ауыл шаруашылығы өнімдері мен азық-түлік импортталады. Бұдан бөлек, электр жабдықтары, мыс және өзге де кен өнімдері бар. Ал елімізге электрлі көліктер, жоғары технология бұйымдары, киім-кешек пен текстиль тасымалданады. Мұнда да цифрлық шешімдер белсенді қабылданып жатыр. Соның нәтижесінде пойыздардың тұру уақыты барынша қысқарды. Мамандар: Қытайдан Еуропаға және Қытайдан Орталық Азия бағытына күніне 27 пойыз өткізуге болады дейді. Авто бекеттердің де өткізу қуаты 80 пайызға дейін өскен. 

Тауарларға навигациялық пломба енгізіледі

ЕАЭО аумағы арқылы өткен шетелдік тауарларға навигациялық пломба енгізу міндеттеледі. Жүйе былтырдан бері «Нұр-Жолы» кеден бекетінде пилоттық режимде сыналып жатыр. 

11 ақпанда күшіне енбек. 2023 жылғы келісімге сай, ЕАЭО аумағынан өткен шетелдік тауарлар «Кеден транзиті» процедурасына қойылуы керек. Бұған дейін қолданыста болған механикалық пломбаларды, енді навигациялық пломбалар алмастырады. Пилоттық жоба аясында 544 автокөлікке 1075 заманауи пломба ілінді. Деректер «Транзит» ақпараттық жүйесіне тіркелді. «Нұр жолы» кеден бекетінің басшысы Мұрат Ерденбековтің айтуынша, ақпараттық жүйелер арасындағы өзара әрекет қамтамасыз етілген, ұлттық оператор жұмыс істейді.  

Ғарышбек Ещанов, ҚР ЖИЦДМ Аэроғарыш комитеті орталығының жедел қызмет департаментінің директоры:

- «Ғарыштық техника және технологиялар институты» навигациялық пломбаларды орнату бойынша Ұлттық оператор болып табылады. Қазіргі уақытта Қазақстанда навигациялық пломбалар жобасын іске асыру соңғы дайындық кезеңінде тұр. ЕАЭО-ның басқа елдеріндегідей, Қазақстанда да навигациялық пломбаларды пайдалана отырып жүк тасымалдарын үздіксіз онлайн режимде бақылауға арналған «Транзит» тасымалдарды қадағалау ақпараттық жүйесі әзірленді. Бұл жүйе жүк қозғалысын бақылауға, сондай-ақ тасымалдау барысында туындауы мүмкін төтенше немесе штаттан тыс жағдайлар туралы уәкілетті органдарды жедел хабардар етуге мүмкіндік береді.

Тауарларға навигациялық пломба енгізіледі

Расында халықаралық тасымалдарды онлайн бақылау құқық бұзушылық пен рұқсатсыз әрекеттер тәуекелін төмендетеді.

Ең бастысы, тасымал қауіпсіздігін күшейтеді. Бұл елдің транзиттік әлеуетін арттырады дейді мамандар. Жалпы пломбаларды енгізу транспорттық-логистикалық саланы цифрландырудың оң нәтижесі. Жүйе бизнес үшін бақылауды жеңілдетіп, «жалған транзиттің» алдын алады, ал мемлекет үшін салық пен бюджет түсімдерін арттырады. Мамандар навигациялық қадағалау кезең-кезеңімен автомобиль және теміржол көлігімен тасымалданатын тауарларға, сондай-ақ Одаққа мүше мемлекеттердің өзара саудасы аясында енгізілетінін жеткізді. Қазір навигациялық пломбалар Ресей мен Беларусь елінде қолданыста.

Мұрат Ерденбеков, «Нұр Жолы» кеден бекетінің басшысы:

- Навигациялық пломбалар қозғалысты, тоқтау нүктелерін, пломбаның тұтастығын тіркейді. «Транзит» жүйесінде автокөлік тасымалдаушылары, менеджерлер және уәкілетті орган қызметкерлері үшін автоматтандырылған жұмыс орындары бар. «Transit» мобильдік қосымшасы екі факторлы аутентификациямен қорғалған, пломбалардың QR және штрихкодтарын сканерлеу, орнату және алу кезінде фотофиксация жасау, тасымал туралы ақпарат алу, маршрутты визуализациялау және маңызды оқиғалар бойынша автоматты хабарламалар жіберу мүмкіндігін береді.

Қазақстан мен Қырғызстан арасындағы «Кеген» өткізу бекетінде электрондық кезек енгізіледі. CarGoRuqsat осы айдың соңында іске қосылады. Бұдан кейін Жамбыл облысындағы Қордай өткізу бекетінде енгізу жоспарланған. Бүгінге дейін ЕАЭО елдерімен байланыстыратын 34 өткізу бекетінде 840 мыңнан аса жүк көлігі электрондық кезек қызметін пайдаланған.