ЕАЭО елдерінде транзитпен өтетін барлық жүк көлігіне навигациялық пломба орнатылады

АСТАНА, 30 шілде – Sputnik. 2026 жылдың 31 шілдесінен бастап ЕАЭО елдерінің аумағы арқылы транзитпен өтетін барлық жүк көлігіне навигациялық пломба орнату міндетті болады, деп хабарлады Ресейдің Қазақстандағы сауда өкілдігі.

"ЕЭК кеңесінің шешімінде көзделген кейбір жүк санаттары ғана бұл талаптан босатылады", – делінген хабарламада.

Жаңа талаптар теміржол арқылы тасымалданатын мынадай жүктерге де қолданылады:

алкоголь өнімдері мен темекі өнімдері;

санкцияға іліккен тауарлар;

аң терісінен жасалған бұйымдар, аяқ киім және киім;

электроника.

"Тасымалдаушыларға, экспорттаушыларға және импорттаушыларға шекарадан өту кезінде кідіріс болмау үшін жеткізілімдерді жоспарлау кезінде жаңа талаптарды алдын ала ескеру ұсынылады", – деп көрсетілген хабарламада.

Навигациялық пломба – көлік құралына орнатылатын электронды құрылғы. Ол жүктің қозғалысын нақты уақыт режимінде бақылауға мүмкіндік береді.

Бұл жүйе тасымалдардың қауіпсіздігі мен ашықтығын арттырады, сондай-ақ қосымша тексерулердің санын қысқартуға ықпал етеді. Жүйені енгізудің алғашқы кезеңі 2026 жылғы 11 ақпанда басталған болатын.