Таза Қазақстан : Бектенов өңірлердегі экологиялық шараларды күшейтуді тапсырды

Премьер‑министр Олжас Бектенов Мемлекет басшысының «Таза Қазақстан» бастамасын жүзеге асыру барысына мониторинг жүргізу жөніндегі орталықтың кезекті отырысын өткізді. 

Жиында өңірлерде тұжырымдаманы іске асыру, волонтерлік қозғалысты қолдау және экотуризмді дамыту мәселелері қаралды. Бектенов жаңа Конституцияда «Таза Қазақстан» ұғымы негізгі қағидат ретінде бекітілгенін атап өтіп, жергілікті атқарушы органдарға маңызды рөл жүктелгенін айтты.

Алматы қаласында 146 мың адам қатысқан сенбіліктерде 18 мың текше метр қалдық шығарылып, 1,4 млн жасыл желек отырғызылды. Алматы облысында 271 мыңнан астам адам экологиялық шараларға қатысып, 98 мыңнан астам ағаш отырғызылды, қалдықтарды қайта өңдеу зауытының құрылысы жалғасуда. Ақтөбе облысында 200 мың ағаш отырғызылып, веложолдар мен электромобильдерге арналған станциялар орнатылды.

Волонтерлік қозғалысты қолдау мәселесі де талқыланды. Бүгінде елімізде 810 ұйым мен 3,5 мың бастамашыл топ жұмыс істейді, белсенді еріктілер саны 300 мыңға жетті. Жыл сайын шамамен 800 мың волонтер экологиялық акцияларға қатысады. Волонтерлерді қолдау үшін цифрлық паспорт енгізу, шағын гранттар бөлу және заңнамалық деңгейде жаңа шаралар әзірленуде.

Экотуризмді дамытуға ерекше назар аударылды. Ұлттық парктерде 179 туристік маршрут пен 42 соқпақ жол бар, келушілер саны 2023 жылғы 2,4 млн‑нан 2025 жылы 3,7 млн‑ға дейін өсті. Іле‑Алатауы, Алтын‑Емел және Шарын ұлттық парктерінде 16 млрд теңгеге дейінгі жобалар іске асуда. Онлайн төлем жүйелері енгізіліп, бақылау‑өткізу пункттері автоматтандырылды.

Премьер‑министр ұлттық парктерді абаттандыру қарқынының баяулығын сынға алып, ірі бизнесті тарту және бірыңғай дизайн‑код бекіту қажеттігін атап өтті. Ол маусым айында өтетін келесі отырыста нақты есеп беруді тапсырды.

Бүгін, 14:04