Таза Қазақстан : Маңғыстауда жастар арасында EKO QUIZ өтті

Маңғыстау облысының Қарақия ауданы – «Таза Қазақстан» республикалық экологиялық акциясы аясында Қарақия ауданында жастардың экологиялық мәдениетін арттыруға бағытталған  EKO-QUIZ  эко-интеллектуалдық сайысы ұйымдастырылды, – деп хабарлайды Aikyn.kz.

Аталған іс-шараны Қарақия аудандық Жастар ресурстық орталығы аудан әкімдігімен және тұрғын үй-коммуналдық шаруашылығы, жолаушылар көлігі және автомобиль жолдары бөлімімен бірлесіп өткізді. Сайысқа аудан жастары мен мемлекеттік қызметшілер қатысып, қоршаған ортаны қорғау бағытындағы білімдерін сынады.

Зияткерлік сайыс барысында қатысушыларға экология, қалдықтарды сұрыптау, табиғатты қорғау, сондай-ақ Маңғыстау өңірінің табиғи ерекшеліктері мен экологиялық мәселелеріне қатысты түрлі деңгейдегі сұрақтар қойылды. Сонымен қатар қатысушылар экологиялық жауапкершілікті арттыруға бағытталған танымдық ақпараттармен танысты.

Шараның негізгі мақсаты – жастар арасында экологиялық сананы қалыптастыру, табиғатқа ұқыпты қарау мәдениетін дамыту, экологиялық сауаттылықты арттыру және тұрғындарды табиғатты қорғау бастамаларына кеңінен тарту.

Сайыс бірнеше кезеңнен тұрды. Қатысушылар Маңғыстау өңірінің табиғи байлықтары, Каспий теңізінің экожүйесі және ерекше қорғалатын табиғи аумақтар туралы білімдерін ортаға салды. Сонымен бірге командалар экологиялық жағдайды жақсартуға бағытталған өз жобалары мен бастамаларын ұсынып, үздік идеялар алдағы уақытта волонтерлік топтардың қолдауымен жүзеге асырылатын болады.

Іс-шара аясында экобелсенділер мен волонтерлер арасында тәжірибе алмасу ұйымдастырылып, қоршаған ортаны қорғау тақырыбында шеберлік сабақтары өткізілді. Жеңімпаз командалар арнайы марапаттармен және сыйлықтармен наградталды.

Аталған бастама өңірдегі экологиялық жағдайды жақсартуға бағытталған «Таза Қазақстан» акциясының маңызды бөлігі болып саналады және қоғамда экологиялық жауапкершілікті қалыптастыруға өз үлесін қосады.