Телефонға күдікті қосымша орнатпаңыз министрлік ескерту жасады

АСТАНА, 20 ақпан – Sputnik. Алаяқтар азаматтардың смартфондарына зиянды қосымшаларды орнату арқылы қашықтан қол жеткізетін схема ойлап тапқан. Ішкі істер министрлігі қазақстандықтарға ескерту жасады.

Қазіргі уақытта Android операциялық жүйесі орнатылған мобильді құрылғыларға зиянды бағдарламаны орнатып, тарату жағдайлары тіркеліп жатыр.

Қаскөйлер оны тарату үшін түрлі тәсілдер қолданады. Мысалы:

мессенджерлер мен әлеуметтік желілер арқылы фишингтік сілтемелерді тарату;

жалған мобильді қосымшалар;

фото, бейне және құжаттар түрінде жасырылған зиянды қосымшалар;

мемлекеттік органдар, банктер және жеткізу қызметтері атынан жіберілетін хабарламалар;

акцияға немесе ұтыс ойынына қатысу сылтауымен қосымша орнатуды талап ететін қоңыраулар.

"Мұндай бағдарлама орнатылғаннан кейін алаяқтар құрылғыға қашықтан қол жеткізу мүмкіндігіне ие болады. Бұл шоттардағы қаражаттың ұрлануына, онлайн-несиелердің рәсімделуіне, жеке деректер мен хат алмасудың таралуына, сондай-ақ телефонды бұғаттап, төлем талап етуге әкеп соғуы мүмкін", - дейді министрлікте.

Өзіңізді қорғау үшін үшінші тұлғалардың өтініші бойынша қосымшаларды орнатпаңыз. SMS арқылы келген кодтарды ешкімге хабарламаңыз. Күмәнді сілтемелерге өтпеңіз. Тек ресми қосымшаларды және антивирустық бағдарламаны пайдаланыңыз, банк операциялары туралы хабарламаларды қосыңыз.

Күдік туындаған жағдайда интернетті дереу өшіріңіз, банкпен байланысыңыз және құқық қорғау органдарына жүгініңіз, дейді полиция.