Теңгерімді байланыс тереңдей түседі

Сенат төрағасы Мәулен Әшімбаев Израильдің Сыртқы істер министрі Гидеон Моше Саармен кездесті. Басқосуда тараптар халықаралық ынтымақтастықты нығайту мәселелерін талқылап, парламентаралық байланысты кеңейтудің басым бағыттарына тоқталып, бірлескен жобаларды іске асыру барысына назар аударды.

М.Әшімбаев мейманға ілтипат білдіре отырып, Қазақстан мен Израиль арасындағы көпжыл­дық әрі көпқырлы ынтымақ­тас­тық жүйелі түрде дамып келе жатқанын атап өтті және парла­мент­аралық өзара іс-қимыл­дың әлеуеті зор екенін тілге тиек етті. Сондай-ақ Сенат төрағасы Израиль Президентінің Астанаға жасайтын алдағы ресми сапары екі ел арасындағы ынтымақтас­тықты одан әрі нығайтуға тың серпін беретініне сенім білдірді.

«Қазақстан мен Израиль арасында, ең алдымен, жоғары деңгейде сындарлы саяси диалог орнағанын атап өткен жөн. Биыл қаңтар айында Мемлекет басшысы Қасым-Жомарт Тоқаев Израиль Премьер-министрі Биньямин Нетаньяхумен телефон арқылы сөйлесті. Әңгіме бары­­сында Қазақстан мен Израиль арасындағы қарым-қатынас­тың оң динамикасы жан-жақ­ты талқыланды. Бүгінде біз Қазақ­стан Парламенті мен Израиль Кнес­сеті арасындағы тығыз қарым-қа­тынасты дамытуға, сондай-ақ, инновациялар, ауыл шаруа­шы­лығы мен су ресурстарын басқару салаларындағы заңна­ма­лық тәжірибелеріңізді зерделеуге мүдделіміз», деді Палата спикері.

Сондай-ақ М.Әшімбаев Қазақ­стан Президентінің Ибраһим келісімдеріне қосылу жөнін­дегі бастамасына назар аударды. Бұл қадам мұсылман ел­дері мен Израиль арасындағы дипломатиялық және экономи­калық байланыстарды нығайтуға бағытталған.

«Мемлекет басшысы Қасым-Жомарт Тоқаевтың Қазақстанның Ибраһим келісімдеріне қосылуы жөніндегі бастамасын Таяу Шығыс­та бейбітшілік орнату жолын­дағы маңызды қадам деп есептейміз. Бұл шешім біздің теңгерімді, сындарлы әрі бейбітшілікке табан тіреген сырт­қы саясатымызға толық сәйкес келеді. Аталған бастама Америка Құрама Штаттарымен, Израиль­мен және араб елдері­мен көпжақты өзара іс-қимылды нығайтып, сындарлы диалогке қажетті кеңістік қалыптастырады деп сенемін», деді М.Әшімбаев.

Сонымен қатар Сенат төр­ағасы елімізде жүзеге асырылып жатқан реформаларға, оның ішінде Мемлекет басшысы Қасым-Жомарт Тоқаевтың әлеу­мет­тік-экономикалық, саяси бас­тамаларының орындалу барысына тоқталды. Атап айт­қанда, экономиканы әртарап­тандыруға, біртұтас әрі орнық­ты ұлттық цифрлық экожүйе қалып­тастыруға бағытталған шаралар мен алдағы конституциялық реформа мәселелері сөз болды.

Жалпы кездесу өткен бұл күн Халықаралық Холокост құрбан­дарын еске алу күнімен тұспа-тұс келіп отыр. Осыған бай­ла­нысты М.Әшімбаев бола­шақ ұрпақ үшін гуманизм мен бейбітшілік идеалдарын қорғау және аталған қасіретті ұмытпау аса маңызды екенін айтты. Осыған байланысты тараптар рухани дипломатияның артып келе жатқан рөлі мен Әлем­­дік және дәстүрлі діндер көш­бас­шы­­ларының съезі аясын­дағы ынты­мақ­тастық бағыттарын талқылады.

Өз кезегінде Гидеон Моше Саар Қасым-Жомарт Тоқаевтың басшы­лығымен Қазақстанда жүр­гі­зіліп жатқан саяси және әлеу­мет­тік-экономикалық рефор­ма­ларға жоғары баға беріп, ын­ты­мақтастықты одан әрі кеңей­тіп, нығайтуға мүдде­лі екенін жеткізді. Инфрақұры­лым, фармацевтика, ауыл шаруа­шы­лығы, тамақ өнеркәсібі, ақпарат­тық технологиялар, цифрландыру және жасанды интеллект салаларын­дағы бірлескен жобаларға да ерекше мән берілді.