Теңіздегі мұнай өндірісі уақытша тоқтады

Қазақстандағы ең ірі мұнай кен орны – Теңізде өндіріс әлі қалпына келген жоқ. Сала дереккөздерінің хабарлауынша, мұнай өндіру кемінде тағы 7-10 күнге тоқтап тұруы мүмкін.

Жоба операторы «Теңізшевройл» Теңіз және Королевское кен орындарында өндіріс уақытша тоқтағанын растады. Бұған электрмен жабдықтау жүйесіндегі ақау себеп болған.

«ҚазМұнайГаздың» мәліметінше, 18 қаңтарда ГТЭС-4 электр станциясында өрт шығып, екі турбиналық трансформатор зақымданған. Соның салдарынан өндірістік процестер толық тоқтаған.

Кейбір сценарийлер бойынша, мұнай өндіру жұмыстары ақпан айының басына дейін қайта басталмауы мүмкін. Тоқтау Каспий Құбыр Консорциумы арқылы экспорт көлемінің қысқаруына әсер етуі ықтимал.