The Voice Қазақстан: жартылай финал

«Хабар» арнасындағы мега-шоу – The Voice Қазақстанның жартылай финалы жақындады. Тікелей эфирдегі таланттылар тартысында бұл жолы сегіз өнерпаз бақ сынайды. Ертең кешкі сағат 20:00-де шешуші кезеңнің қатысушылары анықталады. Байқау мәреге жақындаған сайын үміткерлер де дайындықты күшейтті. 

Дана Мәжитова ширек финалда көрерменнің көзайымына айналып, көп дауыс жинаған қатысушының бірі. Жанкүйерлеріне алғысы шексіз. Енді әрмен қарай қолдау күтеді. Ол қазір тәлімгері Мейрамбек Бесбаевтың бастамасымен жартылай финалға дайындық жасап жатыр.

Дана Мәжитова, байқауға қатысушы:

- Енді жартылай финалда сол қолдаушыларымның, үмітін ақтап жақсы өнер көрсетіп шықсам деймін. Бұл жобада мен өзімнің ғана арманымды емес, әкемнің де арманын орындап жүрмін. Қазір маған шыны керек қатты қолдап отырған әкем мен анам.

Бағым Мухитденова мен Баян Мақсатқызының үкілеген үмітінің бірі – Диас Жорабек. Ол да көрерменнің басым дауысымен жартылай финалға өткен. «The Voice Қазақстан мәреге жақындаған сайын жауапкершілік артып жатыр», - дейді қатысушы.

Диас Жорабек, байқауға қатысушы:

- Алдыңғы ширек финалға дейінгі кезеңде менің орындауыма кішкене хейт келді.  Алайда енді әр адамның өзінің ойы бар, мен ол нәрсеге мұңаймаймын. Жартылай финалға дайындық керемет. Бұйырса өзімді жақсы жағынан тағы да көрсетуге тырысатын боламын.

Мейрамбек Бесбаевтың тобындағы жастар да бас жүлдеден дәмелі. Олар бұл жолы лирикалық ән айтады екен. Тыңдарманның жүрегінен орын табатынына сенімді.  

Мейрамбек Бесбаев, тәлімгер:

- Енді ары қарай патша көңілді көрермен өзі шешер, кімді жақсы көріп қалғанын. Алайда әрқайсысы халықтың махаббатынына бөленеді деп ойлаймын. Сахнаға жаралған адамдар. Мен үшін бәрі қымбат. Енді тағы да екі баламды үкілеп қосайын деп отырмыз. Халықтан қолдау болатын шығар.

Ертең кешкі сағат 20:00-де The Voice Қазақстан жобасын жіберіп алмаңыздар. «Хабар» телеарнасының телеграм арнасы арқылы дауыс беріп, үздік өнерпазды бірге анықтайық.

Авторлары: Аршын Кемелжан, Айдос Қалиев