Тіл үшін сөз айтсаң, бұлар үркітуге көше ме? Белгілі заңгер өзіне хабарласқан белгісіз жан туралы айтты (ВИДЕО)

Белгілі заңгер Нұрсұлтан Орынбеков желідегі парақшасында жаңа видео жариялады, деп хабарлайды Arasha.kz.

Заңгер жариялаған видеоға сүйенсек, оған өзін Марат Қанатұлы деп таныстырған кісі Полиция департаментінен хабарласып тұрғанын айтады. Белгісіз себеп бойынша заңгердің дәл қазір қайда екенін сұрап, сөйлесу қажет екенін ескертеді. Ал бұл мәселеге Нұрсұлтан Орынбеков үзілді-кесілді қарсы болып, "маған ресми түрде 1414-тен шақырту жіберіңдер" дейді.

"Қазақ тілі туралы Конституциядағы өзгерісті айтқаным үшін Астана полиция департаменті хабарласып тұр. Марат Қанатұлына не керек? Тіл үшін сөз айтсаң, бұлар үркітуге көше ме?" – деп жазды Нұрсұлтан Орынбеков желідегі парақшасында.

Желі қолданушылары бұл жағдайға алаңдаушылық білдіріп, пікір қалдырды. Көпшілік заңгердің әрекетін қолдап, мұндай қоңырауларды сөз бостандығына қысым деп бағалады. Пікірлерде "демократия мен еркін пікір қайда қалды?", "заңгерлерге осылай әсер етсе, қарапайым халыққа не болмақ?" деген сауалдар жиі көтерілді.

Айта кетейік, аталған жағдайға қатысты ресми органдар тарапынан әзірге түсініктеме берілген жоқ.