Токиода қатарынан 34 күн бойы жаңбыр жауды: 1886 жылдан бергі рекорд жаңартылды

Күзгі атмосфералық фронт Токионың орталық бөлігіне 29 қыркүйекке дейін қатарынан 34 күн бойы жаңбыр әкелді, деп хабарлайды Tengri Travel The Mainichi басылымына сілтеме жасап.

Газет Жапонияның метеорологиялық агенттігінің (JMA) деректерін келтіреді.

Агенттік мәліметінше, бұл - 1886 жылдан бастап статистика жүргізіле бастағаннан бергі осы аудандағы ең ұзақ жауын-шашын кезеңі. Бұған дейінгі рекорд 33 күнді құраған болатын (2019 жылдың 27 маусымы мен 29 шілдесі аралығы). Агенттіктің Токио орталығындағы бақылау бекеті Тиёда ауданындағы Китаномару саябағында орналасқан.

2019 жылғы рекорд жаздың басындағы жаңбыр маусымына сәйкес келсе, биылғы ұзақ жауын-шашынға Жапонияның басты Хонсю аралына жақын орналасқан стационарлық фронт әсер еткен. Маусымдық фронтқа жылы әрі ылғалды ауаның қайта-қайта келуі, сондай-ақ тайфундардың жақындауы жауын-шашын мөлшерінің артуына ықпал етті.

27 қыркүйектегі жағдай бойынша Токио орталығында қыркүйек айындағы жауын-шашын мөлшері 621,5 миллиметрге жетті. Бұл - айлық орташа нормадан шамамен үш есе көп және 1958 жылдың қыркүйегінде тіркелген 670,9 миллиметрлік рекордтық көрсеткішке жақын.

1-27 қыркүйек аралығында Токио орталығында небәрі 45,8 сағат күн көзі көрінген, бұл - бақылау тарихындағы екінші ең төменгі көрсеткіш.

Жапония астанасынан алынған кадрлардан қолшатыр ұстаған жолаушылардың нөсер астында келе жатқанын, жаңбыр суы жол мен тротуарларды толық басып қалғанын, ал көліктердің өте күрделі әрі сулы жағдайда қозғалуға мәжбүр екенін көруге болады.

Басылым мәліметінше, 30 қыркүйекте Токионы қамтитын Канто аймағында күзгі фронт пен өзге де факторларға байланысты қайтадан жаңбыр күтіледі.

Еске сала кетейік, Қазақстанда Жапония визасына құжат тапсыру тәртібі өзгерді. Жапония елшілігі визаға өтініш беруді жоспарлаған келушілер үшін нөмірленген талондар енгізетіні хабарланған болатын. Толығырақ - материалда.

Бізді Google-дың негізгі дереккөздер тізіміне қосыңыз